ភ្នំពេញៈ ជនសង្ស័យប្រុសស្រី២នាក់ ត្រូវបានសមត្ថកិច្ចប៉ុស្តិ៍ចតុមុខ ឃាត់ខ្លួនបន្ទាប់ពីធ្វើសកម្មភាពឆក់កាបូប ពីស្ត្រីរងគ្រោះម្នាក់បានសម្រេច។ ហេតុការណ៍នេះបានកើតឡើងកាលពីវេលាម៉ោង៤រសៀល ថ្ងៃទី៩ ខែកក្កដា ឆ្នាំ២០១៧ ស្ថិតតាមបណ្តោយផ្លូវព្រះស៊ីសុវត្ថិ ទល់មុខសណ្ឋាគារកាំបូឌីយ៉ាណា ក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យទាំង២នាក់ប្តីប្រពន្ធដែលឃាត់ខ្លួនបានខាងលើនេះ មានឈ្មោះ នី ស្រីនាង ភេទស្រី អាយុ១៨ឆ្នាំ មុខរបរកម្មកររោចក្រ ស្នាក់នៅម្តុំចំការដូង ខណ្ឌដង្កោ មានស្រុកកំណើតនៅខេត្តស្វាយរៀង និងជនសង្ស័យជាប្តីមានឈ្មោះ លី ស្រីនី ភេទប្រុស អាយុ១៦ឆ្នាំ មុខរបរកម្មកររោងចក្រ ស្នាក់នៅជាមួយគ្នា មានស្រុកកំណើតនៅសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។

ចំណែកស្ត្រីរងគ្រោះជាម្ចាស់កាបូបមានឈ្មោះម៉ឺ ម៉ារីយ៉ា អាយុប្រហែល៥០ឆ្នាំ ស្នាក់នៅសង្កាត់ទំនប់ទឹក ខណ្ឌចំការមន។

ប្រភពព័ត៌មានពីស្ត្រីរងគ្រោះបានឲ្យដឹងថា មុនពេលកើតហេតុ គាត់បានជិះម៉ូតូម៉ាកគុប ពណ៌ក្រហម ពាក់ស្លាកលេខ ភ្នំពេញ 1B-4668 បើកតាមបណ្តោយផ្លូវព្រះស៊ីសុវត្ថិ ទិសដៅពីត្បូងទៅជើង លុះមកដល់ចំណុចកើតហេតុ ក៏ស្រាប់តែលេចមុខជនសង្ស័យខាងលើ ជិះម៉ូតូមកអែប ហើយធ្វើសកម្មភាពឆក់កាបូបគាត់បានសម្រេច រួចព្យាយាមជិះគេចខ្លួន តែត្រូវគាត់ស្រែកថាចោរៗទើបធ្វើឲ្យផ្អើលដល់សមត្ថកិច្ចដែលកំពុងល្បាតចាប់បានតែម្តង។

ក្រោយពេលកើតហេតុ បន្ទាប់ពីជនរងគ្រោះបានដាក់ពាក្យបណ្តឹងហើយនោះ សមត្ថកិច្ចបានប្រគល់កាបូបឲ្យទៅជនរងគ្រោះវិញ។ ចំណែកជនសង្ស័យទាំង២នាក់ប្តីប្រពន្ធ ត្រូវបានឃាត់ខ្លួនបណ្តោះអាសន្ននៅប៉ុស្តិ៍ចតុមុខ ដើម្បីសាកសួរនិងបញ្ជូនទៅផ្នែកជំនាញនៃអធិការដ្ឋានខណ្ឌដូនពេញចាត់ការតាមនីតិវិធីច្បាប់៕

https://youtu.be/Gx7ozsku6G4