ភ្នំពេញ: បុរសម្នាក់ជាមេម៉ៅការតខ្សែបណ្តាញអ៊ិនធឺណេតស្លាប់ភ្លាមៗ ខណ:កំពុងឡើងតបណ្តាញខ្សែកាបនៅលើបង្គោលភ្លើងបណ្តាលឲ្យឆ្លងចរន្តអគ្គិសនីធ្លាក់ចុះមកខាងក្រោមមកដី បណ្តាលឲ្យស្លាប់យ៉ាងអាណោចអាធម៌។

ហេតុការណ៍ភ្ញាក់ផ្អើលខាងលើនេះ បានកើតឡើងកាលពីវេលាម៉ោង៤ និង១៥នាទី រសៀលថ្ងៃទី១១ ខែកក្កដា ឆ្នាំ២០១៧ ស្ថិតនៅបណ្តោយផ្លូវ៣៧១ ក្នុងភូមិត្នោតជ្រុំ សង្កាត់បឹងទំពុន ខណ្ឌមានជ័យ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញមានក្រុមជាងតខ្សែកាបមួយក្រុម មានគ្នា៣នាក់ បានជិះរម៉កម៉ូតូកង់៣មួយគ្រឿង ដឹកសម្ភារ:មកជួសជុលខ្សែកាបនៅចំណុចកើតហេតុខាងលើ ខណ:នោះជនរងគ្រោះខាងលើបានឡើងតខ្សែកាបនៅលើបង្គោលភ្លើង កម្ពស់ប្រមាណ៦ម៉ែត្រ ក៏បានឆ្លងនិងខ្សែកាបនៅខាងលើបង្គោលបណ្តាលឲ្យឆក់ធ្លាក់ចុះមកបោកក្បាលស្លាប់ភ្លាមៗនៅកន្លែងកើតហេតុ។

ក្រោយពេលកើតហេតុ ក៏មានរថយន្តសង្រ្គោះបន្ទាន់របស់មន្ទីរពេទ្យបង្អែកខណ្ឌមានជ័យ បានមកដឹកជនរងគ្រោះខាងលើដែរ តែជាអកុសល្យជនរងគ្រោះបានស្លាប់បាត់បង់ជីវិតបាត់ទៅហើយ ដោយជនរងគ្រោះខាងលើនេះត្រូវបានមិត្តភក្តិដែលមកជាមួយគ្នាបានប្រាប់ឲ្យដឹងថា មានឈ្មោះ នុត អាយុ៣០ឆ្នាំ។បច្ចុប្បន្នសមត្ថកិច្ចកំពុងស្រាវជ្រាវរកក្រុមគ្រួសារសាច់ញាតិមកទទួលយកទៅធ្វើបុណ្យតាមប្រពៃណី៕