ភ្នំពេញ: គ្រោះថ្នាក់ចរាចរណ៍មួយបានកើតឡើង បន្ទាប់ពីនារី២នាក់ បានជិះម៉ូតូមួយគ្រឿងម៉ាកស៊ុយសាគីនិចឆ្លងផ្លូវមកម្ខាងទៀត ត្រូវម៉ូតូហុងដាឌ្រីម សេ១២៥ មួយគ្រឿងទៀតដែលកំពុងជិះគ្នា៤នាក់ បុកពេញទំហឹង បណ្តាលឲ្យនារី២នាក់ រងរបួសធ្ងន់ធ្ងរនៅនឹងកន្លែងត្រូវបានរថយន្តសាមុយ បញ្ជូនទៅមន្ទីរពេទ្យភ្លាមៗ និងមនុស្ស៤នាក់ទៀត រងរបួសស្រាល។

ហេតុការណ៍នេះបានកើតឡើងកាលពីវេលាម៉ោង១១និង១០នាទីយប់ ថ្ងែទី១២ ខែកក្កដា ឆ្នាំ២០១៧ ស្ថិតនៅតាមបណ្តោយផ្លូវព្រះមុនីរ៉េត ស្ថិតក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញ នារី២នាក់ ជិះម៉ូតូមួយគ្រឿងម៉ាកស៊ុយសាគីនិច ពណ៌ខ្មៅ ពាក់ស្លាកលេខ ភ្នំពេញ 1FO- 6431 ធ្វើដំណើរតាមបណ្តោយផ្លូវព្រះមុនីរ៉េត ក្នុងទិសដៅពីជើងទៅត្បូង ខណ:មកដល់កន្លែងកើតហេតុខាងលើ នារីទាំង២នាក់ បានជិះម៉ូតូបត់ឆ្វេងចូលទៅផ្លូវម្ខាងទៀត ភ្លាមៗនោះក៏មានម៉ូតូមួយគ្រឿងម៉ាក ហុងដាឌ្រីមសេ១២៥ ពណ៌ខ្មៅ ជិះដោយបុរសនារី៤នាក់ គ្មានស្លាកលេខ ធ្វើដំណើរក្នុងទិសដៅពីពីត្បូងទៅជើង បញ្រ្ចាស់ទិសគ្នាក្នុងល្បឿនយ៉ាងលឿន បានជ្រុលទៅបុកម៉ូតូនិចដែលជិះដោយនារី២នាក់ខាងលើ យ៉ាងពេញទំហឹង បណ្តាលឲ្យនារីម្នាក់ជិះម៉ូតូនិច និងនារីម្នាក់ខាងម៉ូតូហុងដាឌ្រីម រងរបួសធ្ងន់ធ្ងរនៅនឹងកន្លែង ត្រូវបានរថយន្តសាមុយបញ្ជូនទៅមន្ទីរពេទ្យភ្លាមៗតែម្តង និងមនុស្សប្រុសស្រី៤នាក់ទៀត រងរបួសស្រាល បង្កឲ្យមានការភ្ញាក់ផ្អើលនិងកកស្ទះយ៉ាងខ្លាំងនៅកន្លែងកើតហេតុ ចំណែកម៉ូតូរងការខូចខាតទាំងសងខាងតែម្តង។

ក្រោយពេលកើតហេតុសមត្ថកិច្ចជំនាញចរាចរណ៍បានចុះមកធ្វើការវាស់វែងយកម៉ូតូទាំង២គ្រឿងយកទៅរក្សាទុកនៅអធិការដ្ឋាននគរបាលខណ្ឌមានជ័យដើម្បីរង់ចាំការដោះស្រាយនៅពេលក្រោយបន្តទៀត៕