ភ្នំពេញ: បើតាមសមត្ថកិច្ច បានឲ្យដឹងថា នៅវេលាម៉ោង២២ និង៣០នាទីយប់ថ្ងៃទី១៥ ខែកក្កដា មានបុរសពីរនាក់ ជិះម៉ូតូនិចមួយគ្រឿងឌុបគ្នា ក្នុងល្បឿនលឿនមិនប្រយ័ត្នជ្រុលបុករថយន្ដព្រូស កំពុងបត់ឆ្វេងឆ្លងផ្លូវពេញទំហឹង បណ្ដាលឲ្យបាក់ភ្លៅម្នាក់ និងម្នាក់ទៀតរងរបួសបោកក្បាលសន្លប់ស្ដូកស្ដឹង ត្រូវបានរថយន្ដសង្គ្រោះបន្ទាន់ ដឹកយកទៅសង្គ្រោះភ្លាមៗនៅមន្ទីរពេទ្យ ។
ហេតុការណ៍នេះ បានកើតឡើងនៅចំណុចខាងមុខច្រកចូលផ្សារទំនើប សុវណ្ណា តាមបណ្ដោយផ្លូវលេខ២៧១ ក្នុងសង្កាត់ទំនប់ទឹក ខណ្ឌចម្ការមន រាជធានីភ្នំពេញ ។
ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុគេបានឃើញ រថយន្ដមួយគ្រឿងម៉ាកព្រូសពណ៌ស ពាក់ស្លាកលេខ ភ្នំពេញ2Y-1816 បើកបរដោយបុរសម្នាក់ ធ្វើដំណើរតាមបណ្ដោយផ្លូវលេខ២៧១ ទិសដៅពីជើងទៅត្បូង ពេលមកដល់ចំណុចកើតហេតុរថយន្ដក៏បានបត់ឆ្វេង ឆ្លងផ្លូវចូលច្រកផ្សារទំនើបសុវណ្ណា ។ នៅពេលដែលរថយន្ដកំពុងតែបត់បានពាក់កណ្ដាលផ្លូវ ក៏មានម៉ូតូមួយគ្រឿងម៉ាកនិចពណ៌ស លាយខ្មៅ ពាក់ស្លាកលេខ ភ្នំពេញ1DE-5821 ជិះដោយបុរសពីរនាក់ក្នុងល្បឿនលឿន ទិសដៅបញ្ច្រាសគ្នា បានបុករថយន្ដចំក្បាលរថយន្ដពេញទំហឹង បណ្ដាលឲ្យរងរបួសធ្ងន់ទាំងពីរនាក់ ចំណែកម៉ូតូ និងរថយន្ដរងការខូចខាតទាំងសងខាង ។
ក្រោយពីកើតហេតុ រថយន្ដសង្គ្រោះបន្ទាន់ បានទៅដឹកជនរងគ្រោះទាំងពីរនាក់ ទៅសង្គ្រោះនៅមន្ទីរពេទ្យ ចំណែកម្ចាស់រថយន្ដត្រូវបានសមត្ថកិច្ចឃាត់ខ្លួន យកទៅសួរនាំ រីឯរថយន្ដ និងម៉ូតូ ត្រូវបានកម្លាំងជំនាញចុះធ្វើការវាស់វែង រួមយកទៅរក្សាទុកនៅអធិការដ្ឋាននគរបាលខណ្ឌចម្ការមន ដើម្បីរងចាំដោះស្រាយនៅពេលក្រោយ ៕
មតិយោបល់