កណ្តាលៈ បើតាមសមត្ថកិច្ច នៅថ្ងៃទី១៦ ខែកក្កដានេះ បានឲ្យដឹងថា មានករណីហិង្សាដោយចេតនា បានកើតទ្បើងនៅវេលាម៉ោង ៧យប់ថ្ងៃទី ១៥ ខែកក្កដា ឆ្នាំ២០១៧ ស្ថិតនៅចំណុច ភូមិពុកឫស្សីក្រោម ឃុំពុកឫស្សី ស្រុកខ្សាច់កណ្តាល ខេត្តកណ្តាល។

ជនរងគ្រោះ ឈ្មោះ ថន វិសាល ភេទប្រុស អាយុ ២៤ឆ្នាំ ជនជាតិខ្មែរ មុខរបរ កសិករ មានទីលំនៅភូមិ ឃុំ កើតហេតុ (របួសស្នាមបែកថ្ងាស់មួយកន្លែង) ត្រូវជាប្អូនថ្លៃ។ ចំណែកឯជនសង្ស័យ ឈ្មោះ ធីម ថាច ភេទប្រុស អាយុ ៣៧ឆ្នាំ ជនជាតិខ្មែរ មុខរបរ កម្មករពពុះសណ្តែក មានទីលំនៅភូមិឃុំកើតហេតុ ជាបងថ្លៃ ត្រូវបានសមត្ថិកច្ចឃាត់ខ្លួន។

ប្រភពពីសមត្ថកិច្ច បានប្រាប់ឲ្យដឹងថា នៅថ្ងៃទី១៥ ខែកក្កដា ឆ្នាំ២០១៧ វេលាម៉ោង ៥ ល្ងាច ជនសង្ស័យ បានទៅផឹកស្រាថ្នាំ នៅផ្ទះឈ្មោះ យាយ ផាន់ រហូតដល់ម៉ោង ៦ និង៣០នាទី ទើបជនសង្ស័យក៏ត្រឡប់មកផ្ទះវិញ។ ពេលមកដល់ផ្ទះ ក៏ឃើញប្រពន្ធរបស់ខ្លួនឈ្មោះ ថន វណ្ណី កំពុងឈ្លោះប្រកែក ជាមួយបងស្រីបង្កើតឈ្មោះ ថន វណ្ណា ពេលនោះជនសង្ស័យ បានច្រានឈ្មោះ ថន វណ្ណា ដួលទៅលើគ្រែ ឃើញដូចនេះឈ្មោះ ថន វិសាល បានរត់ចូលទៅឃាត់ ហើយក៏មានទំនាស់ ជាមួយជនសង្ស័យ ភ្លាមៗនោះ ជនសង្ស័យស្ទុះទាញយកដំបងឈើគុប វាយត្រូវចំថ្ងាស់ជនរងគ្រោះ បណ្តាលឲ្យបែកចេញឈាម ក្រោយមកកម្លាំងនគរបាលប៉ុស្តិ៍ពុកឫស្សី បានចុះអន្តរាគមន៍ឃាត់ខ្លួនជនសង្ស័យ និងបញ្ជូនមកអធិការដ្ឋាននគរបាលស្រុកខ្សាច់កណ្តាល បន្តចាត់ការតាមនីតិវិធី ៕