ភ្នំពេញៈ បុរសជាអ្នកលក់គុយទាវពេលរាត្រីម្នាក់ ត្រូវបានខ្សែរភ្លើងឆក់ស្លាប់ខណៈកំពុងបោសសំរាមនៅជិតស្លាកយីហោផ្ទះសំណាក់ ហេង ចន្ធី បង្កឲ្យភ្ញាក់ផ្អើលដល់បងប្អូននៅក្បែរនោះ ទោះជារត់ទៅជួយក៏ហួសពេលដែរ។

ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង១១និង៣០នាទីយប់ ថ្ងៃទី១៧ ខែកក្កដា ឆ្នាំ២០១៧ ស្ថិតនៅជាប់ចិញ្ចើមផ្លូវជាតិលេខ៣ ភូមិព្រៃព្រីងត្បូង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មានបានឲ្យដឹងថា ជនរងគ្រោះមានឈ្មោះ សុខ វណ្ណៈ ភេទប្រុស អាយុ៣៦ឆ្នាំ មុខរបរលក់ដូរ រស់នៅភូមិព្រៃព្រីងត្បូង សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ។ ចំណែកម្ចាស់ផ្ទះសំណាក់មានឈ្មោះ កែវ សុខុម ភេទប្រុស អាយុ៤៥ឆ្នាំ មុខរបរ ជាងកញ្ចក់ មានស្រុកកំណើតនៅភូមិចុងកោះ ឃុំកោះអណ្ដែត ស្រុកស្រីសន្ធរ ខេត្តកំពុងចាម។ មានប្រពន្ធ ឈ្មោះ ឡាយ ធី អាយុ៣៥៤ឆ្នាំ មុខរបរ បើកផ្ទះសំណាក់ នៅកន្លែងកើតហេតុ មានស្រុកកំណើតនៅសង្កាត់ផ្សារដើមគរ ខណ្ឌទួលគោក។ សព្វថ្ងៃទាំង២នាក់ប្ដីប្រពន្ធ រស់នៅក្នុងកន្លែងកើតហេតុខាងលើទើបបាន៣ខែ ហើយទាំង២នាក់ប្ដីប្រពន្ធពេលកើតហេតុភ្លាមត្រូវបានសមត្ថកិច្ចឃាត់ខ្លួនយកមកសួរនាំនៅប៉ុស្ដិ៍នគរបាលចោមចៅ។

ព្រភពពីបងថ្លៃស្រីជនរងគ្រោះបញ្ជាក់ឲ្យដឹងថា មុនពេលកើតហេតុ៧ថ្ងៃមុន ស្លាកផ្ទះសំណាក់ខាងលើបានឆក់ចៅរបស់គាត់ម្ដងរួចមកហើយ តែមិនគ្រោះថ្នាក់ ហើយគាត់ក៏បានប្រាប់ម្ចាស់ផ្ទះសំណាក់ដែរ តែហាក់មិនអើពើអ្វីឡើយ ដោយឆ្លើយថាបើវាឆក់កុំទៅជិតស្លាកហ្នឹងទៅ។

ប្រភពដដែលបានបន្តថា នៅយប់កើតហេតុ ប្អូនរបស់គាត់ជាជនរងគ្រោះ បានយកអំបោសបោសសំអាតជិតស្លាកផ្ទះសំណាក់ស្រាប់តែត្រូវខ្សែភ្លើងឆក់ដួល ភ្លាមៗនោះក្មួយជនរងគ្រោះបានយកភួយចាប់ខ្សែភ្លើងចេញ ព្យាយាមជួយជនរងគ្រោះដោយដឹកតាមរ៉ឺម៉កកង់បីយកទៅសង្រ្គោះនៅមន្ទីរពេទ្យរុស្ស៊ី តែជាអកុសលជនរងគ្រោះបានដាច់ខ្យល់ស្លាប់បាត់ទៅហើយ។

ក្រោយពេលកើតហេតុ សាច់ញាតិជនរងគ្រោះបានរាយការណ៍ប្រាប់សមត្ថកិច្ចជំនាញឲ្យជួយចុះមកពិនិត្យមើល ទីតាំងកើតហេតុ ចំណែកសពក្រោយពេលដឹកដល់មន្ទីរពេទ្យបានស្លាប់ ត្រូវបាននគរបាលជំនាញទៅពិនិត្យកោសល្យវិច្ឆ័យដល់មន្ទីរពេទ្យពិតជាស្លាប់ដោយសារខ្សែភ្លើងឆក់ពិតប្រាកដមែន ហើយបានប្រគល់សពជូនទៅក្រុមគ្រួសារធ្វើបុណ្យតាមប្រពៃណី៕