បន្ទាយមានជ័យៈ កម្លាំងនគរបាលក្រុងប៉ោយប៉ែត បានធ្វើការឃាត់ខ្លួនជនសង្ស័យជាមុខសញ្ញាជួញដូរគ្រឿងញៀនរួមនិងគូកនចំនួន៣នាក់ បញ្ជូនទៅតុលាការដើម្បីចាត់ការតាមនីតិវិធីច្បាប់។

លោក ធិន ស៊ិនដេត អធិការនៃអធិការដ្ឋានក្រុងប៉ោយប៉ែតបានប្រាប់អង្គភាពPost News ថា កាលពីវេលាម៉ោង៣រសៀល ថ្ងៃទី១៧ ខែកក្កដា ឆ្នាំ២០១៧ កម្លាំងជំនាញរបស់នគរបាលក្រុង បានឃាត់ខ្លួនមុខសញ្ញាចាស់ចំនួន៣នាក់ដែលក្នុងនោះម្នាក់ជាមុខសញ្ញាជួញដូរទើបតែចេញពីពន្ធនាគារ។

ជនទាំង៣ទី១-ឈ្មោះ ថ ប៊ុនថា ភេទប្រុស អាយុ២៣ឆ្នាំមុខរបរគ្មាន រស់នៅភូមិបាលិលេយ្យ១ ជាម្ចាស់បន្ទប់ ,ទី២-ឈ្មោះ ស៊ូ ឃៀង ភេទប្រុស អាយុ២៧ឆ្នាំ មុខរបរគ្មាន រស់នៅក្នុងបន្ទប់ជួលភូមិក្បាលស្ពាន២ សង្កាត់-ក្រុងប៉ោយប៉ែត និងទី៣ ឈ្មោះ នង លីហេង ភេទប្រុស អាយុ២១ឆ្នាំ មុខរបរគ្មានរស់នៅភូមិបាលិលេយ្យ២។

លោកបន្តថា ក្រោយឃាត់ខ្លួនសមត្ថកិច្ចដកហូតបានថង់ប្លាស្ទិចសម្រាប់ច្រកថ្នាំញៀនមួយចំនួន ទូរសព្ទដៃ៣គ្រឿង ដបស៊ីសា១ ដែកកេះ៦ កន្រ្តៃ៥ ដបកែច្នៃសម្រាប់ ជក់ថ្នាំញៀន១ ក្រដាសពណ៌ទឹកប្រាក់២ដុំផងដែរ៕