ព្រះសីហនុៈ លោកអធិការរងស្រុកកំពង់សិលាបានប្រាប់Post News ថា មានករណីគ្រោះថ្នាក់ចរាចរណ៍មួយ ដោយរថយន្តម៉ាកតាកូម៉ាមួយគ្រឿងក្រឡាប់ជាច្រើនជុំ បណ្តាលឲ្យមានមនុស្សស្លាប់និងរបួស។

ហេតុការណ៍នេះកើតឡើងកាលពីវេលាម៉ោង៦ព្រឹក ថ្ងៃទី១៩ ខែកក្កដា ឆ្នាំ២០១៧ ស្ថិតនៅចំណុចគីឡូម៉ែត្រ១៣២-១៣៣ ចំណុចផ្លូវក្រាលគ្រួសក្រហម​ ក្នុងស្រុកកំពង់សិលា ខេត្តព្រះសីហនុ។

រថយន្តដែលក្រឡាប់នេះម៉ាក តាកូម៉ា ពណ៌ទឹកប្រាក់ ពាក់ស្លាកលេខ ភ្នំពេញ 2AI-7692 រួមដំណើរដោយបុរសជនជាតិវៀតណាម២នាក់ តាមបណ្តោយផ្លូវខាងលើពីភ្នំពេញឆ្ពោះទៅព្រះសីហនុ លុះដល់ចំណុចកើតហេតុ រថយន្តបានធ្លាក់ពីលើផ្លូវក្រាលគ្រួសក្រហម កាវថ្នល់រួចយកចង្កូតឡើងថ្នល់វិញ​បណ្តាលឲ្យក្រឡាប់ជាច្រើនជុំតែម្តង។

ក្នុងនោះក៏បណ្តាលឲ្យ បុរសម្នាក់ឈ្មោះ ជិន សឿងទូ ភេទប្រុស អាយុ៣៥ឆ្នាំ ជនជាតិវៀតណាមស្លាប់ (ជាអ្នកបើកបរ) និងម្នាក់ទៀតឈ្មោះ ហង ស៊ុនវៀត ភេទប្រុស អាយុ៣៣ឆ្នាំ ជនជាតិវៀតណាមដូចគ្នា រងរបួសផងដែរ៕