ភ្នំពេញ៖ ថ្ងៃទី០៧ មេសា ២០១៦ ចាប់ពីម៉ោង១២ថ្ងៃត្រង់ ដល់ម៉ោង៩យប់ សាលារាជធានីភ្នំពេញ នឹងប្រកាសជាផ្លូវការក្នុងការបិទធ្វើចរាចរណ៍ លើកំណាត់ផ្លូវចំនួន៣ខ្សែ ដើម្បីរៀបចំពិធីថ្វាយព្រះពរសង្រ្កាន្តឆ្នាំថ្មីថ្វាយព្រះករុណា ព្រះបាទ សម្តេចព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា ដែលរៀបចំដោយសហភាពសហព័ន្ឋយុវជនកម្ពុជា សហការជាមួយគណ:កម្មាធិការជាតិរៀបចំបុណ្យជាតិ-អន្តរជាតិ ហើយក្នុងការបិទផ្លូវនេះ សាលារាជធានី ក៏បានសូមការយោគយល់ពីប្រជាពលរដ្ឋ ក្នុងការបញ្ចៀសចរាចរណ៍បណ្តោះអាសន្ននេះផងដែរ។
បើតាមសេចក្តីជូនដំណឹងរបស់រដ្ឋបាល សាលារាជធានីភ្នំពេញ ចុះថ្ងៃទី០៦ មេសានេះបានបញ្ជាក់ថា ផ្លូវដែលត្រូវបិទរួមមាន កំណាត់ផ្លូវតិរវិថីព្រះស៊ីសុវត្ថិ ចាប់ពីផ្លូវលេខ១៧៨ រហូតដល់ផ្លូវលេខ ២៤០ , កំណាត់ផ្លូវផ្លូវលេខ១៧៨ ចាប់ពីតិរវិថីព្រះស៊ីសុវត្ថិរហូតដល់ផ្លូវលេខ ១៩ និងកំណាត់ផ្លូវលេខ២៤០ ចាប់ពីតិរវិថីព្រះស៊ីសុវត្ថិ រហូតដល់ផ្លូវលេខ ១៩ និងបញ្ចៀសការធ្វើចរាចរណ៍តាមផ្លូវលេខ១៩ ពីជើងទៅត្បូង និងពីត្បូងមកជើង៕ ស្រីរ័ត្ន
មតិយោបល់