ភ្នំពេញៈ រថយន្តស៊េរីទំនើបស្លាកលេខ ភ្នំពេញ2AJ-7777មួយគ្រឿង បើកបញ្ចា្រសទិសគ្នាបានប៉ះជាមួយនឹងម៉ូតូម៉ាកឌ្រីម ស៊េរីឆ្នាំ២០១៦ បណ្តាលឲ្យអ្នកជិះម៉ូតូរងរបួសស្រាល ចំណែកម៉ូតូនិងរថយន្តរងការខូចខាត។

គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០និង៤០នាទីថ្ងៃត្រង់ទី២១ ខែកក្កដា ឆ្នាំ២០១៧ ស្ថិតតាមបណ្តោយផ្លូវអ៊ា៦ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញ រថយន្តស៊េរីទំនើបមួយគ្រឿង ពណ៌ក្រហម ពាក់ស្លាកលេខ ភ្នំពេញ2AJ-7777 បើកយ៉ាងលឿង ក្នុងទិសដៅបញ្ចា្រសទិសដៅចរាចរណ៍ ទិសដៅពីលិចទៅកើត តាមបណ្តោយផ្លូវអ៊ា៦ លុះមកដល់ចំណុចកើតហេតុក៏ជ្រុលចង្កូតទៅប៉ះម៉ូតូឌ្រីមស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1FN-8656 ដែលកំពុងជិះឌុបគ្នា២នាក់ ទិសដៅពីកើតទៅលិច ដោយល្បឿនមធ្យម និងត្រូវទិសចរាចរណ៍បណ្តាលឲ្យដួលរងរបួសស្រាលទាំង២នាក់។ ចំណែករថយន្តនិងម៉ូតូរងការខូចខាតដោយម៉ូតូវៀចចង្កឹះលេខ និងកន្លែងផ្សេងទៀត។ រីឯរថយន្តរងការខូចខាតផ្នែកខាងឆ្វេងបន្តិចបន្តួចផងដែរ។

ក្រោយពីហេតុការណ៍នេះបានកើតឡើង ភាគីទាំងសងខាងបានធ្វើការចរចារគ្នាដោយបញ្ចប់រឿងនៅនឹងកន្លែងផងដែរ ដោយម្នាក់ៗដូចជាប្រញាប់ប្រញាល់ដល់ហើយ៕

https://youtu.be/Xdd_qjtztc0