បាត់ដំបង: លោក វរសេនីយ៍ត្រី អ៊ឹង សុវណ្ណ អធិការរងស្រុកថ្មគោលបានដឹកនាំកម្លាំងជំនាញស្រុកនឹងកម្លាំងប៉ុស្តិ៍តាម៉ឺនបានចុះប្រតិបត្តិការបង្រ្កាបករណីរក្សាទុកជួញដូរដឹកជញ្ជូនដោយខុសច្បាប់ នូវសារធាតុញៀន ឃាត់ខ្លួនបានជនសង្ស័យ២នាក់រួមជាមួយវត្ថុតាងមួយចំនួន។

ប្រតិបត្តិការនេះបានធ្វើឡើងនៅវេលាម៉ោង៦និង១០នាទីល្ងាច ថ្ងៃទី២០ ខែកក្កដា ឆ្នាំ២០១៧ ត្រង់ចំណុចឃុំតាម៉ឺន ស្រុកថ្មគោល ខេត្តបាត់ដំបង។

ជនសង្ស័យទី១ឈ្មោះ ធឿន ប៊ុនធី ភេទប្រុស អាយុ២៥ឆ្នាំ រស់នៅភូមិអង់ខាងជើង ឃុំតាម៉ឺន ស្រុកថ្មគោល ខេត្តបាត់ដំបង និងទី២ឈ្មោះ ខុម ឆៃយ៉ា ភេទប្រុស អាយុ២៤ឆ្នាំ រស់នៅភូមិគោកត្រប់ ឃុំតាម៉ឺន ស្រុកថ្មគោល ខេត្តបាត់ដំបង។
វត្ថុតាងដកហូតរួមមាន ថ្នាំញៀនប្រភេទមេតំហ្វេតាមីន (ម៉ាទឹកកក)ចំនួន១០ថង់តូច ថង់សំរាប់ច្រកថ្នាំ៥ ដែកកេះ៥ កញ្ចប់សំរាប់ដាក់ថ្នាំ១ ទុយោសំរាប់ច្រកថ្នាំ១ និងម៉ូតូហុងដាស៊េរី២០១៤ចំនួន១គ្រឿង។

បច្ចុប្បន្ន ជនសង្ស័យត្រូវបានកម្លាំងជំនាញស្រុកថ្មគោលកំពុងសាកសួរដើម្បីកសាងសំណុំរឿងចាត់បន្តតាមនីតិវិធីច្បាប់៕