បាត់ដំបងៈ កម្លាំងអធិការដ្ឋាននគរបាលបានធ្វើការបង្ក្រាបក្រុមក្មេងទំនើង ឃាត់ខ្លួនបាន១៩នាក់ ក្នុងនោះមានស្រី៦នាក់ រួមជាមួយម៉ូតូ៨គ្រឿង។

ប្រតិបត្តិការនេះបានធ្វើឡើងនៅវេលាម៉ោង២និង៣០នាទីរំលងអាធ្រាតឈានចូល ថ្ងៃទី២២ ខែកក្កដា ឆ្នាំ២០១៧ ស្ថិតនៅក្រុងបាត់ដំបង ខេត្តបាត់ដំបង។

ប្រភពព័ត៌មានបានឲ្យដឹងថា ស្របពេលដែលមាននូវករណីចាប់ឃាត់ខ្លួនជនសង្ស័យខាងលើ កម្លាំងរបស់អធិការដ្ឋាននគរបាលក្រុងបាត់ដំបងបានចុះល្បាតត្រួតពិនិត្យតាមដងផ្លូវ និងគោលដៅសំខាន់ៗក្នុងក្រុងបាត់ដំបង ហើយបានប្រទះឃើញក្រុមក្មេងទំនើង ដែលតែងតែ បង្ករការរំខាន និងការអុកឡុកតាមសួនច្បារនាៗ ក្នុងក្រុងបាត់ដំបង រួចក៏បានធ្វើការបង្ក្រាបក្រុមក្មេងទំនើងនោះ ដោយឃាត់ខ្លួនបានចំនួន១៩នាក់ ស្រី៦នាក់ និងម៉ូតូចំនួន៨គ្រឿងផងដែរ។

ក្រោយពីស្តាប់ចម្លើយរួចមក សមត្ថកិច្ចយើងបានធ្វើតេស្តទឹកនោម រកសារធាតុថ្នាំញៀន រួចក៏បានរកឃើញអ្នកមានសារធាតុញៀនចំនួន៨នាក់។

បច្ចុប្បន្នក្រុមក្មេងទំនើងទាំងអស់ត្រូវបានឪពុកម្តាយមកធានាយកទៅផ្ទះវិញ ដើម្បីធ្វើការណែនាំនិងអប់រំបន្ថែម៕