កោះកុង៖ អំពើហិង្សាក្នុងគ្រួសារ បានកើតឡើងដោយសារតែកូនស្រីខឹងឪពុករបស់ខ្លួន ផឹកស្រាស្រវឹក មករករឿងចង់វាយម្តាយ ក៏ទាញកាំបិតមកកាប់ឪពុកខ្លួនឯងបណ្តាលឲ្យធ្លាយពោះ។
អំពើហិង្សានេះ បានកើតឡើងកាលពីព្រលប់ថ្ងៃទី៦ មេសា នៅចំណុចភូមិ១ សង្កាត់ស្មាច់មានជ័យ ក្រុងខេមរភូមិន្ទ។ ប្រភពព័ត៌មាន បានឲ្យដឹងថា ជនរងគ្រោះជាឪពុកឈ្មោះ ហ៊ុន ណេង ភេទប្រុស អាយុ៤២ឆ្នាំ មានមុខរបរកម្មករលីឈើ បានផឹកស្រាជាមួយមិត្តភ័ក្ដិ បានត្រឡប់មកដល់ផ្ទះវិញ បានទាស់សម្តីជាមួយប្រពន្ធ រហូតមានការប្រតាយប្រតប់គ្នា ខណ:នោះស្រាប់តែកូនស្រីស្ទុះទៅទាយកាំបិតមកកាប់គាត់ បណ្តាលឲ្យរងរបួសធ្លាយពោះវៀនតែម្តង។ បច្ចុប្បន្ន កំពុងសម្រាកព្យាបាលនៅមន្ទីរពេទ្យ ។
ប្រភពព័ត៌មាន បានបន្ដថា បើតាមប្រពន្ធជនរងគ្រោះវិញថា ប្តីរបស់ខ្លួនតែងតែផឹកស្រាវឹង និងប្រើហិង្សាលើរូបគាត់ ជាច្រើនលើកច្រើនសារ ហើយគាត់ក៏ធ្លាប់ប្តឹងទៅសមត្ថកិច្ចឲ្យចាប់ជនរងគ្រោះដាក់គុកម្តងហើយ តែជនរងគ្រោះនៅតែមិនរាងចាល លុះនៅយប់កើតហេតុ ជនរងគ្រោះបានស្រវឹងស្រាជោគជាំ គាត់ក៏ប្រាប់ថា ឯងស្រវឹងហើយចូលសំរាកទៅ ស្រាប់តែជនរងគ្រោះវាយចាន វាយឆ្នាំង ឃើញដូចនេះ គាត់ក៏ទះកំផ្លៀងជនរងគ្រោះពីរដៃ ខណ:នោះកូនស្រីកាន់កាំបិតនៅក្នុងដៃ ហើយគាត់ទាញកាំបិតពីដៃកូនស្រីកាប់ទៅលើជនរងគ្រោះតែម្តង៕
មតិយោបល់