កំពង់ធំៈ លោក​ វង សូត រដ្ឋមន្ត្រីក្រសួងសង្គមកិច្ច អតីត យុទ្ធជន និងយុវនីតិសម្បទាបានមានប្រសាសន៍ថា គណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា តែងតែគិតគូរជានិច្ចចំពោះសេចក្តីសុខរបស់បងប្អូនប្រជាពលរដ្ឋជាក់ស្តែងសូម្បីនិវត្តជន ជនពិការ និងគ្រួសារយុទ្ធពលី ក៏សម្តេចមិនដែលបំភ្លេចពីគុណបំណាច់របស់ពួកគាត់បាននោះឡើយ ព្រមទាំងបានឲ្យក្រសួងសង្គមកិច្ច និងគ្រប់មន្ទីរទាំងអស់ត្រូវយកចិត្តទុកដាក់ចំពោះនិវត្តជន ជនពិការ និងគ្រួសារយុទ្ធពលី ត្រូវបើកប្រាក់ខែជូនពួកគាត់ឲ្យបានទាន់ពេលវេលា។

លោក វង សូត បានមានប្រសាសន៍នេះ ក្នុងពិធីចែកអំណោយដល់អតីតយុទ្ធជន និងយុវនីតិសម្បទា ខេត្តកំពង់ធំ នៅ ថ្ងៃទី២៦ ខែឧសភា ឆ្នាំ២០១៦ បានចែកអំណោយដល់បងប្អូនប្រជាពលរដ្ឋក្រីក្រ និវត្តជន ជនពិការ និងគ្រួសារយុទ្ធពលី ចំនួន២០០គ្រួសារ នៅក្នុងមជ្ឈមណ្ឌលកុមារកំព្រាខេត្តកំពង់ធំ និងបើកប្រាក់សមហរណកម្មជូនដល់យុវជនចំនួន១១នាក់ ដែលត្រូវវិលទៅរស់នៅក្នុងសហគមន៍វិញ ដោយក្នុង ម្នាក់ៗទទួលបានថវិកាចំនួន១លាននិង ៨ម៉ឺនរៀល ចំណែកគ្រួសារនិវត្តជន ជនពិការ និងគ្រួសារយុទ្ធពលី ចំនួន២០០គ្រួសារ ក្នុង១គ្រួសារទទួលបានអង្ករ២៥គីឡូក្រាម​ ទឹកត្រី១យួរ ទឹកស៊ីអ៊ីវ១យួរ ទឹកបរិសុទ្ធប៊ីដុងធំ១ប៊ីដុង និងថវិកា​ចំនួន២០០០០រៀល​។

លោក​ វង សូត បានបន្ត​​​ថា ក្រសួងសង្គមកិច្ច អតីត យុទ្ធជន និងយុវនីតិសម្បទា និងមន្ទីរសង្គមកិច្ច មានតួរនាទីភារកិច្ចគឺជាអ្នកបើកប្រាក់បៀរវត្តន៍ជូនបងប្អូននិវត្តជន ជនពិការ និងគ្រួសារយុទ្ធពលីដូចមន្ត្រីរាជការផ្សេងៗដែរ ដោយមិនរងចាំ២ទៅ៣ខែបានបើកជូននោះទេ!ហើយក្រសួង កំពុងតែធ្វើការសម្របសម្រួលដល់បងប្អូនពិការណាដែលមកបើកប្រាក់មិនរួច ហើយត្រូវផ្ទេរសិទ្ធនោះ គឺត្រូវផ្ទេរតែត្រឹមថ្នាក់ខេត្ត ដើម្បីកាត់បន្ថយការចំណាយ៕