Post News Media ព័ត៌មានជាតិ ប្តីប្រពន្ធនិ...

ប្តីប្រពន្ធនិងកូនពីរនាក់ដែលរថយន្តធំកិនខ្ទេចនៅលើកំណាត់ផ្លូវជាតិលេខ៥ ត្រូវបានអាជ្ញាធរចូលរួមរំលែកទុក្ខ

បន្ទាយមានជ័យ: គ្រោះថ្នាក់ចរាចរណ៍​ដែលបង្ក​ក្តីវិនាស​ដល់​គ្រួសារ​មួយ​ពេលនេះ​ត្រូវ​បាន​អាជ្ញាធរចូលរួម​រំលែកទុក្ខ​ដោយ​ការបរិច្ចាគ​ក្តាមឈូស និង​ថវិកាមួយចំនួន​ដល់គ្រួសារ​សព​។

​លោក​​​ អាត់​ ខែម​ ស្នងការ​​​នគរបាលខេត្តបន្ទាយមានជ័យ នៅព្រឹកថ្ងៃទី២៨ ខែឧសភា ឆ្នាំ២០១៦នេះ បាននាំយកក្តាមឈូស​ចំនួន៤ និងថវិកា៥០ម៉ឺនរៀល ដែលជាថវិកាចូលរួមរំលែកទុក្ខ​ពី​ឧបនាយករដ្ឋមន្ត្រី​ កែ​ ​គឹមយ៉ាន​ ប្រធានអាជ្ញាធរជាតិ​យុទ្ធប្រឆាំងគ្រឿងញៀន​ទៅប្រគេនដល់ព្រះសង្ឃក្នុងវត្តនិមិត្ត ដើម្បីរៀបចំដាក់សពមួយគ្រួសារដែលបានស្លាប់ក្នុងឧបទ្ទវហេតុគ្រោះថ្នាក់ចរាចរណ៍ដ៏រន្ធត់ កាលពីវេលាម៉ោង១០យប់ថ្ងៃទី២៧ ខែឧសភាម្សិល​មិញ​ ​នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ ៣៨២-៣៨៣ ស្ថិតក្នុងភូមិម៉ក់ហ៊ឺន ឃុំកូប ស្រុកអូរជ្រៅ ខេត្តបន្ទាយមានជ័យ។

​សពជនរងគ្រោះទាំង៤នាក់ ទី១ឈ្មោះ នៅ សុធី ភេទប្រុស អាយុ៣៨ឆ្នាំ ត្រូវជាប្តី និងសពទី២ឈ្មោះ ឆេង ស៊ីណៃ អាយុ៣១ឆ្នាំ ត្រូវជាប្រពន្ធ រីឯសព២នាក់ទៀត ត្រូវជាកូនប្រុស-ស្រី មានវ័យទើបតែ ៤-៦ឆ្នាំ ប៉ុណ្ណោះ។

សពត្រូវបានគេឲ្យដឹងថា មានទីលំនៅក្នុងភូមិថ្មបាំង ឃុំបឹងបេង ស្រុកម៉ាឡៃ ខេត្តបន្ទាយមានជ័យ។​

​ប្រភពប្រាប់ថា នៅមុនពេលកើតហេតុ គឺជនរងគ្រោះត្រូវរថយន្តមួយគ្រឿងបានកៀរម៉ូតូពួកគេឲ្យដួលបោកទៅកណ្តាលថ្នល់ ហើយគាប់ជួនរថយន្តធំមួយគ្រឿងដែលបើកមកពីក្រោយ ក៏បានបុកនិងកិនស្លាប់យ៉ាងអាណោចអធម ទាំង៤នាក់តែម្តង។ ​សពបានបែកជាបំណែកមើលលែងយល់ រថយន្តក្រោយបង្កបានបន្ថែមល្បឿនទៅមុខគេចបាត់ស្រមោល។​ បច្ចុប្បន្ន សពកំពុងរៀបចំធ្វើបុណ្យបូជា នៅវត្តរតននិមិត្ត៕

photo_2016-05-28_14-17-54

photo_2016-05-28_14-17-53

photo_2016-05-28_14-17-52

photo_2016-05-28_14-17-51

photo_2016-05-28_14-15-42

photo_2016-05-28_14-15-38

photo_2016-05-28_14-15-37

photo_2016-05-28_14-15-36