កំពង់ធំ: លោកប្រធានការិយាល័យចរាចរណ៍នៃស្នងការដ្ឋាននគរខេត្តកំពង់ធំ បានប្រាប់ Post News ថា កាលពីវេលាម៉ោង ០៨ យប់ថ្ងៃទី១១ ខែសីហា ឆ្នាំ២០១៧ មានករណីគ្រោះថ្នាក់ចរាចរណ៍មួយ បានបង្កទ្បើងរវាងរថយន្ត និងរថយន្ត ក្នុងទិសដៅស្របគ្នា បណ្តាលឲ្យស្លាប់មនុស្សម្នាក់នាក់។

ហេតុការណ៍នេះដែរ បានកើតទ្បើងនៅលើកំណាត់ផ្លូវជាតិលេខ ៦ ភូមិអូរសួស្តី ឃុំបារាយណ៍ ស្រុកបារាយណ៍ ខេត្តកំពង់ធំ។

រថយន្តក្រុងដឹកអ្នកដំណើររបស់ក្រុមហ៊ុនថោង ស៊ីង ពណ៌លឿង ពាក់ស្លាកលេខភ្នំពេញ3D.3283 ទិសដៅពីជើងទៅត្បូង បើកបរដោយឈ្មោះ ឃុត ថេត ភេទប្រុស អាយុ ៥៧ឆ្នាំ ស្នាក់នៅភូមិតានឹម ឃុំខ្វាវ ស្រុកសំរោង ខេត្តតាកែវ ត្រូវបានឃាត់ខ្លួននៅអធិការដ្ឋាននគរបាលស្រុកបារាយណ៍។ ចំណែកឯអ្នករួមដំណើរ ឈ្មោះ សែ វុធថា ភេទប្រុស អាយុ ២២ឆ្នាំ នៅភូមិរកាកោង ឃុំទី២ ស្រុកមុខកំពូល ខេត្តកណ្តាល ស្លាប់នៅមន្ទីរពេទ្យបង្អែក។

ប្រភពីសមត្ថកិច្ច បានប្រាប់ឲ្យដឹងថា រថយន្តដឹកអ្នកដំណើររបស់ក្រុមហ៊ុនថោង ស៊ីង បានបុកគូទរថយន្ត ម៉ាកហ៊ីយ៉ិនដាយ ពណ៌ស ពាក់ស្លាកលេខកំពង់ធំ3A.1672 បើកបរដោយឈ្មោះ ឈិត សុភា ភេទប្រុស អាយុ ៣៩ឆ្នាំ ស្នាក់នៅភូមិត្រាច ឃុំត្បែង ស្រុកកំពង់ស្វាយ ខេត្តកំពង់ធំ ត្រូវបានឃាត់ខ្លួន នៅអធិការដ្ឋាននគរបាលស្រុកបារាយណ៍។

ករណីនេះសមត្ថកិច្ចជំនាញ កំពុងចងក្រងសំណុំរឿង និងប្រមូលវត្ថុតាងទៅរក្សាទុក នៅអធិការដ្ឋាននគរបាលស្រុកបារាយណ៍ ដើម្បីរងចាំការដោះស្រាយនៅពេលក្រោយ ។

សូមជំរាបថា សមត្ថកិច្ចជាបឋមថា បានបញ្ជាក់ថា មូលហេតុដែលបង្កឲ្យមានគ្រោះថ្នាក់នេះ គឺដោយអ្នកបើកបររថយន្តដឹកអ្នកដំណើរ វ៉ាជែង ក្នុងស្ថានភាពគ្រោះថ្នាក់ ៕