ភ្នំពេញៈ យោងតាមប្រភពពីសមត្ថកិច្ចខណ្ឌ៧មករា បានឲ្យដឹងថា រឿងចម្លែកប្លែកគួរឲ្យហួសចិត្តមួយបានកើតឡើងកាលពីល្ងាចថ្ងៃទី១២ ខែសីហា ឆ្នាំ២០១៧ ដែលមានស្ត្រីម្នាក់បានមកយំស្រែកតវ៉ានៅមុខអធិការដ្ឋានខណ្ឌ៧មករា ដោយ អះអាងថា ខ្លួនជាជនរងគ្រោះនៃអំពើ ប៉ុនប៉ងរំលោភសេពសន្ថវៈ និងបានប្តឹងឲ្យនគរបាលចាប់ខ្លួនជនសង្ស័យឈ្មោះ ជួន ចាន់រី បញ្ជូនទៅកាន់តុលាការ តែរឿងគួរឲ្យនាងមិនអស់ចិត្តនោះគឺព្រះរាជអាជ្ញារង ឈ្មោះ ចែ សុង បានសម្រេចបញ្ជូនជនសង្ស័យទៅមណ្ឌលបន្សាបគ្រឿងញៀនទៅវិញ ដោយមិនបានគិតគូរពីរឿង ជនសង្ស័យ ដេញចាប់ជនរងគ្រោះរំលោភអ្វីឡើយ។
ប្រភពបន្ដថា នារីរងគ្រោះ បានស្រែកសុំឲ្យនគរបាលជួយបកស្រាយ និងស្នើឲ្យលោក ចែ សុង ជាព្រះរាជអាជ្ញារង កាន់សំណុំរឿង បកស្រាយឲ្យនាង យល់ផង ព្រោះក្នុងនាមជា ជនរងគ្រោះម្នាក់នាងយល់ថា ជារឿងអយុត្តិធម៌ពេកចំពោះនាង។
ពាក់ព័ន្ធករណីនេះ លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងតាម Telegram ថា«អយ្យការសម្រេចសេចក្តីដោយពិនិត្យលើឯកសារសំណុំរឿង អង្គហេតុ អំពើរបស់ជនល្មើស រួមទាំងបទបញ្ញត្តិច្បាប់ជាធរមាន»។
លោកបន្ដថា «អយ្យការសូមបញ្ជាក់អំពីករណីដែលពាក់ពន្ធ័នឹងជនសង្ស័យឈ្មោះ ជួន ចាន់រី ថា អយ្យការសម្រេចសេចក្តីលើសំណុំរឿងនេះដោយពិនិត្យលើឯកសារសំណុំរឿង អង្គហេតុ អំពើរបស់ជនល្មើស ភស្តុតាង រួមទាំងបទបញ្ញត្តិច្បាប់ជាធរមាន»។
«ការចោទប្រកាន់ធ្វើឡើងដោយត្រឹមត្រូវទៅតាមអំពើរបស់ជនល្មើសដែលមានអង្គហេតុនិងភស្តុតាងស៊ីសង្វាក់បញ្ជាក់យ៉ាងច្បាស់លាស់ ឈានទៅដល់ការកំណត់បទល្មើសប្រើប្រាស់គ្រឿងញៀន ហើយសម្រេចបញ្ជូនទៅមជ្ឈមណ្ឌលស្តារនីតិសម្បទានិងព្យាបាលគ្រឿងញៀន»។
អ្នកនាំពាក្យរូបនេះ បន្ថែមថា «រឿងនេះដោយសង្ខេបគឺគ្មានអង្គហេតុដែលពាក់ពន្ធ័នឹងពាក្យបណ្តឹង ហើយពាក្យបណ្តឹងមិនមានអានុភាពឲ្យព្រះរាជអាជ្ញាចោទប្រកាន់ទេបើមិនទាន់បានស៊ើបអង្កេត គ្មានអង្គហេតុ គ្មានភស្តុតាងដាក់បន្ទុក»។
គួររំលឹកថា កម្លាំងសមត្ថកិច្ចខណ្ឌ៧មករាបានឃាត់ខ្លួនជនសង្ស័យឈ្មោះ ជួន ចាន់រី ភេទប្រុស អាយុ ៣២ឆ្នាំ មុខរបរជា អង្គរក្ស មានទីលំនៅ ផ្ទះលេខ៥សេ ផ្លូវទី៣ សង្កាត់ចោមចៅ ខណ្ឌពោធិ៍សែនជ័យ កាលពីថ្ងៃទី៩ ខែសីហា ឆ្នាំ២០១៧ នៅគ្រាដែលស្ត្រីរងគ្រោះម្នាក់ បានស្រែក និងចោទប្រកាន់ថាជនសង្ស័យ បានចាប់ប៉ុនប៉ងចាប់នាងរំលោភសេពសន្ថវៈ នៅចំណុចផ្ទះលេខ១១៨E1 ផ្លូវលេខ២៤២កែង១៦៣ សង្កាត់វាលវង់ ខណ្ឌ៧មករា។
ក្រោយពេលឃាត់ខ្លួនជនសង្ស័យជាក់ស្តែងនៅហ្នឹងកន្លែងកើតហេតុសមត្ថកិច្ចបាននាំខ្លួនជនសង្ស័យទៅសាកសួរ និងកសាងសំណុំរឿង ប៉ុនប៉ងរំលោភសេពសន្ថវៈ ទៅកាន់តុលការដើម្បីចាត់ការបន្តតាមនីតិវិធី លុះដល់ល្ងាចថ្ងៃសៅរ៍ទី១២ ខែសីហា ឆ្នាំ២០១៧ ស្រាប់តែលោក ចែ សុង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានសម្រេចបញ្ជូនខ្លួនជនសង្ស័យទៅមណ្ឌលបន្សាបគ្រឿងញៀន ដោយមិនបានចោទជនសង្ស័យពីបទ ប៉ុនប៉ងរំលោភសេពសន្ថវៈ ដូចនគរបាលធ្វើរបាយការណ៍បញ្ជូនទៅនោះទេ៕
មតិយោបល់