ភ្នំពេញៈ គ្រោះថ្នាក់ចរាចរណ៍មួយបានកើតឡើងរវាងរថយន្ដម៉ាក Lexus មួយគ្រឿងបើកបរក្នុងល្បឿនលឿនមិនប្រុងប្រយ័ត្ន បានជ្រុលទៅបុកនឹងម៉ូតូកង់បីមួយគ្រឿងដែលកំពុងបត់ឆ្លងផ្លូវពេញទំហឹង បណ្ដាលឲ្យមនុស្ស២នាក់របួសធ្ងន់ធ្ងរត្រូវបានរថយន្ដសាមុយដឹកទៅមន្ទីរពេទ្យភ្លាមៗ។

ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១និង២៨នាទីយប់ឈានចូលថ្ងៃ១៦ ខែសីហា ឆ្នាំ២០១៧ តាមបណ្ដោយផ្លូវព្រះស៊ីសុវត្ថិ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

យោងតាមប្រភពព័ត៌មាន បានឲ្យដឹងថា មុនពេលកើតហេតុ គេបានឃើញបុរសម្នាក់បានបើករថយន្ដមួយគ្រឿងម៉ាក Lexus RX300 ពណ៌ស្ករ ពាក់ស្លាកលេខ ភ្នំពេញ 2AP-7741 បានធ្វើដំណើរតាមបណ្ដោយផ្លូវ ព្រះស៊ីសុវត្ថិ ក្នុងទិសដៅពីត្បូងទៅជើង ខណៈធ្វើដំណើរ មកដល់កន្លែងកើតហេតុ ក៏បានបើកបុកនឹងម៉ូតូកង់បីមួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1J-0135 ដែលធ្វើដំណើរ ក្នុងទិសដៅពីកើតទៅលិច ព្យាយាមឆ្លងផ្លូវ តាមបណ្ដោយផ្លូវ ព្រះស៊ីសុវត្ថិ ពេញទំហឹងបណ្ដាលឲ្យបុរសនិងនារី២នាក់ទៀត របួសធ្ងន់ធ្ងរបែកក្បាលហូរ ឈាមពេញថ្នល់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ក្រោយពេលកើតហេតុ សមត្ថកិច្ចជំនាញចរាចរណ៍ ចុះមកធ្វើការវាស់វែងយករថយន្ដនឹងម៉ូតូកង់បីទាំង២គ្រឿង យកទៅរក្សាទុកនៅស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាពេលក្រោយតាមផ្លូវច្បាប់បន្តទៀត៕