ភ្នំពេញៈ ជនសង្ស័យជាចោរឆក់យ៉ាងសកម្មចំនួន២នាក់ ធ្វើសកម្មភាពឆក់កាបូបស្ពាយពីស្ត្រីម្នាក់បានសម្រេច ហើយជិះរត់គេច តែត្រូវមានអ្នកចិត្តធម៌ម្នាក់ បើករថយន្តតាមដេញកៀរម៉ូតូជនសង្ស័យរហូតចាប់បានម្នាក់ និងចំណែកម្នាក់ទៀតរត់គេចខ្លួនបាត់ស្រមោល។

ហេតុការណ៍នេះកើតឡើងកាលពីវេលាម៉ោង ៨និង១០នាទីយប់ថ្ងៃទី១៨ ខែសីហា ឆ្នាំ២០១៧ ចំណុចចំណតរថយន្តក្រុងខាងកើតសាលាតិចណូ តាមបណ្តោយផ្លូវ២៨៩ ស្ថិតក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ។

ជនសង្ស័យដែលឃាត់ខ្លួនបានមានឈ្មោះ ស៊ិន វិឆ័យ អាយុ២០ឆ្នាំ ស្នាក់នៅផ្ទះជួលនៅសង្កាត់ផ្សារដេប៉ូ១ ជិះម៉ូតូម៉ាកហុងដា Beat ពណ៌សលាយខៀវ គ្មានស្លាកលេខ។

តាមប្រភពពីកន្លែងកើតហេតុ បានឲ្យដឹងថា មុនដំបូងឡើយគេបានឃើញជនរងគ្រោះជាស្ត្រីម្នាក់ បានចុះពីលើរថយន្តមួយគ្រឿងម៉ាកឆ្លាម ពណ៌ទឹកមាស មិនចាំស្លាកលេខ ចុះនៅចំណុចកើតហេតុដោយដៃមានយួរកាបូប១ ភ្លាមនោះក៏មានជនសង្ស័យទាំង២នាក់ខាងលើ ជិះម៉ូតូមកពីក្រោយធ្វើសកម្មភាពលូកដៃឆក់កាបូបបានសម្រេច ហើយជិះចេញទៅ។ ស្របគ្នានោះក៏មានប្រជាពលរដ្ឋល្អដែលឃើញហេតុការណ៍ផ្ទាល់ បានបើករថយន្តដេញតាមពីក្រោយជនសង្ស័យ ដេញកៀរបណ្តាលឲ្យដួលខ្ទេចមួយកំណាត់មុខនិងចាប់បានជនសង្ស័យម្នាក់ ដោយស្រ្តីរងគ្រោះប្រញាប់ស្រវ៉ាយកកាបូបមកវិញ ចំណែកបក្ខពួកម្នាក់ទៀតបានងើបរត់ផ្លោះរបងចូលសាលាតិចណូបាត់ស្រមោល។

ក្រោយកើតហេតុ សមត្ថកិច្ចបាននាំខ្លួនជនសង្ស័យនិងម៉ូតូធ្វើសកម្មភាព ទៅកាន់អធិការដ្ឋាននគរបាលខណ្ឌទួលគោក ដើម្បីសាកសួរនាំជនសង្ស័យ និងកសាងសំណុំរឿងចាត់ការតាមនិតិវិធីច្បាប់បន្តទៀត ៕