ភ្នំពេញៈ រថយន្តម៉ាកហាយឡែនឌ័រមួយគ្រឿង បើកចេញពីផ្លូវតូចឡើងមកផ្លូវធំមិនប្រយត្ន័ បានទៅប៉ះជាមួយរថយន្តម៉ាកឡិចស៊ី៥៧០ ពេញទំហឹង បណ្តាលឲ្យរថយន្ត៥៧០ ឆ្កូតនឹងវៀចឈ្នាន់ឡើងរថយន្ត។ ចំណែកឯរថយន្តហាយទ្បែនឌ័រវិញ ខូចខាតថ្ពាល់ខាងឆ្វេងបង្កឲ្យមានការជជែកគ្នាមួយសន្ទុះធំ។

ហេតុការណ៍គ្រោះថ្នាក់ចរាចរណ៍នេះបានកើតទ្បើងកាលពីវេលាម៉ោង១០និង២០នាទីយប់ថ្ងៃទី១៨ ខែសីហា ឆ្នាំ២០១៧ ស្ថិតនៅចំណុចក្រោមស្ពានអាកាសតិចណូ មុខអគ្គនាយកដ្ឋានពន្ធដារជាតិ ក្នុងសង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ ។

តាមប្រភពព័តមានពីកន្លែងកើតហេតុបានឲ្យដឹងថា មុនដំបូងគេឃើញរថយន្តម៉ាក ហាយឡែនឌ័រ មួយគ្រឿង ពណ៌ស ពាក់ស្លាកលេខ ភ្នំពេញ 2 AA-6973 បានបើកចេញពីផ្លូវលេខ១១២ ក្នុងទិសដៅពីកើតទៅលិច ឡើងមហាវិថីម៉ៅសេទុង ស្របគ្នានោះក៏មានរថយន្តម៉ាកឡិចស៊ីស ៥៧០ ពណ៌ស ពាក់ស្លាកលេខ ភ្នំពេញ 2AU-7677 បើកតាមបណ្តោយមហាវិថីម៉ៅសេងទុង ក្នុងទិសដៅពីត្បូងទៅជើង បានទៅកៀរជាមួយរថយន្តហាយឡែនឌ័រដែលបើកចេញមកមិនប្រយ័ត្ន បណ្តាលឲ្យរថយន្ត៥៧០ ឆ្កូតឈ្នាន់ជាន់ឡើងរថយន្ត ចំណែករថយន្តហាយទ្បែនឌ័រខូចខាតថ្ពាល់ខាងឆ្វេងតែម្តង។

ក្រោយកើតហេតុភាគីទាំងសងខាង បានឈប់រថយន្តជជែកគ្នាយកខុសយកត្រូវមួយសន្ទុះ ចុងក្រោយភាគីរថយន្តឡិចស៊ីស៥៧០ ខ្ជិលនាំរឿងវែងឆ្ងាយ ក៏សងសំណងទៅខាងរថយន្តហាយឡែនឌ័រចំនួន១០ម៉ឺនរៀលដើម្បីបញ្ចប់រឿងតែម្តង៕