ព្រៃវែងៈ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីមានរថយន្តម៉ាក ហ៊ីយ៉ាន់ដាយមួយគ្រឿង កំពុងបើកសុខៗ​ស្រាប់តែបែកកង់ ក្រឡាប់ជាច្រើនត្រឡប់ បណ្តាលឲ្យឆេះកាប៊ីនរថយន្តផ្អើលដល់ប្រជាពលរដ្ឋ និងសមត្ថកិច្ចចុះមកអន្តរាគមន៍បាញ់ពន្លត់។

ហេតុការណ៍នេះបានកើតឡើងកាលពីវេលាម៉ោង១១ថ្ងៃត្រង់ ទី២៤ ខែសីហា ឆ្នាំ២០១៧ ស្ថិតនៅចំណុចតាមបណ្តោយផ្លូវជាតិលេខ១ ចន្លោះគីឡូម៉ែត្រលេខ៨៣-៨៤ ភូមិព្រីង ឃុំក្រាំងស្វាយ ស្រុកព្រះស្តេច ខេត្តព្រៃវែង ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍ខាងលើនេះកើតឡើង ខណៈដែលរថយន្តម៉ាកហ៊ីយ៉ាន់ដាយ ពណ៌បៃតងចាស់ ពាក់ស្លាកលេខ ភ្នំពេញ 3B-6758 ដឹកភេសជ្ជៈ បើកដោយឈ្មោះ ចំរុង ភេទប្រុស អាយុ៣១ឆ្នាំ ស្នាក់នៅភូមិយោត ឃុំមេសរ ប្រចាន់ ស្រុកពារាំង ខេត្តព្រៃវែង ដោយបានបើកបរក្នុងទិសដៅពីលិចទៅកើត លុះដល់ចំណុចកើតហេតុខាងលើ រថយន្តក៏បានបែកកង់បណ្តាលឲ្យក្រឡាប់ ឆេះក្នុងកាប៊ីនតែម្តង បង្កការភ្ញាក់ផ្អើលដល់បងប្អូនប្រជាពលរដ្ឋ រួមនិងរថយន្តពន្លត់អគ្គិភ័យស្រុកព្រះស្តេច ចេញមកជួយអន្តរាគមន៍ ពន្លត់បានទាន់ពេលវេលា ដោយមិនបណ្តាលឲ្យនរណាមានរបួសនោះទេ៕