កំពង់ឆ្នាំងៈ ជិះក្នុងល្បឿនលឿនរថយន្តវ៉ាជែងចូលចំណែកផ្លូវរថយន្ដ បុកចំពីចំហៀងពេញទំហឹង បណ្ដាលឲ្យរងរបួសធ្ងន់ទាំងពីរនាក់ រដូករណែលដេកពេញផ្លូវតែម្តង។
ហេតុការណ៍ គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៧និង១៥នាទីព្រឹកថ្ងៃទី០១ មិថុនា ២០១៦ លើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ៤០ និង៤១ត្រង់ចំណុចស្ពានទី៤ ស្ថិតក្នុងភូមិពោធិរិទ្ធិក្រៃ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។
សមត្ថកិច្ចនគរបាលចរាចរណ៍ស្រុក បានឲ្យដឹងថា ជនរងគ្រោះខាងលើ មានឈ្មោះ ស៊ីម រ៉ូ ភេទប្រុស អាយុ២៥ឆ្នាំ ជាអ្នកបើកបរម៉ូតូម៉ាកសេ១២៥ ពណ៌ខ្មៅ ពាក់ស្លាកលេខPP1CW4467 និងម្នាក់ទៀតឈ្មោះ ខេង ភេទប្រុសអាយុ២៥ឆ្នាំ បើកបរពីជើងទៅត្បូងបញ្ច្រាសទិសគ្នាជាមួយរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ (PP3A5241) បើកបរពីត្បូងទៅជើង។
សមត្ថកិច្ចបានបន្ដថា នៅមុនពេលកើតហេតុគេឃើញជនរងគ្រោះបើកបរម៉ូតូក្នុងល្បឿនលឿនជិះឌុបគ្នាទំនងជាមានអ្វីនៅពីមុខ ហើយបានជ្រុលចង្កូតទៅចូលចំណែករថយន្តដែលបានបើបរបញ្ច្រាសទិសគ្នា បណ្តាលឲ្យបុកចូលចំពីហៀងខាងឆ្វេងកងមុខរថយន្ត ធ្វើឲ្យអ្នកបើកបរម៉ូតូដាច់ដៃបាក់ជើងខ្ទេចសាច់ និងម្នាក់ទៀតក៏រងរបួសធ្ងន់ដូចគ្នាដេករណូករណែលនៅនិងកន្លែងកើតហេតុ ដោយឡែកម៉ូតូរងការខូចខាតទាំងស្រុង។
ក្រោយពេលកើតហេតុ អ្នកបើកបររថយន្តធុនធំបានចុះរត់គេចខ្លួនបាត់ស្រមោល ដោយបន្សល់ទុករថយន្តនិងនៅហ្នឹងកន្លែងកើតហេតុ។ ចំពោះម៉ូតូនិងរថយន្តត្រូវបានសមត្ថកិច្ចនាំយកមករក្សារទុកនៅប៉ុស្ដិ៍កសាងឯកសារបញ្ជូនបន្តទៅការិយាល័យចរាចរណ៍ផ្លូវគោកនៃស្នងការរដ្ឋាននគរបាលខេត្តចាត់ការតាមនីតិវិធី៕
មតិយោបល់