(ភ្នំពេញ) ៖ ជនសង្ស័យ ០៣នាក់ ត្រូវបានកម្លាំងល្បាតរបស់ខណ្ឌ ប៉ុស្តិ៍ និងប្រជាការពារឃាត់ខ្លួនកាលពីវេលាម៉ោង ១និង៣០នាទីរំលងអាធ្រាត្រ ឈានចូលថ្ងៃទី០៨ ខែមេសា ឆ្នាំ២០១៦ ស្ថិតនៅចំណុចផ្លូវបេតុង ក្រុមទី១៣ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ។
សមត្ថកិច្ច បានបញ្ជាក់ទៀតថា នៅមុនពេលកើតហេតុ កម្លាំងល្បាតរបស់ខណ្ឌ ប៉ុស្តិ៍ និងប្រជាការពារសង្កាត់ឫស្សីកែវបាន និងកំពុងជិះល្បាត ស្រាប់តែបានប្រទះឃើញជនសង្ស័យ ០៣នាក់ ពេលនោះ សមត្ថកិច្ចយើងបានធ្វើការឃាត់ខ្លួន ហើយបានធ្វើការឆែកឆេររកឃើញនៅដែកអក្សរតេសំរាប់កាច់សោ ករម៉ូតូមួយផ្លែ ទួរឺវីស មួយ និងដែកលួសសំរាប់ឆ្កឹះសោផ្ទះចំនួន ១០កំណាត់ ។
ជនសង្ស័យទាំង ០៣នាក់ មានឈ្មោះ ទី១. ឈ្មោះ សែម ឈី ហៅអាមាក់ ភេទ ប្រុស អាយុ ២៥ឆ្នាំ, ទី២ . ឈ្មោះគៀង វិចិត្រ ហៅ ទូ ភេទ ប្រុស អាយុ ២៥ឆ្នាំ និងទី៣. ឈ្មោះ មាស ពិសែន ហៅឡែន ហៅ ស្ទីក ភេទ ប្រុស អាយុ ៣០ឆ្នាំ និងម៉ូតូ មួយគ្រឿង ម៉ាក ស្មាក់ ពណ៌ ក្រហម ពាក់ស្លាកលេខ ភ្នំពេញ 1AD-1006 ។
បច្ចុប្បន្នជនសង្ស័យទាំង ០៣នាក់ខាងលើ ត្រូវបានសមត្ថកិច្ចប៉ុស្តិ៍ឫស្សីកែវបញ្ជូនខ្លួនយកទៅឃុំនៅអធិការដ្ឋាននគរបាលខណ្ឌឫស្សីកែវ ដើម្បីបញ្ជូនទៅកាន់តុលាការចាត់ការបន្តតាមផ្លូវច្បាប់ ៕ ស៊ុនតិច
មតិយោបល់