(ភ្នំពេញ)៖ នៅក្នុងឱកាសនៃពិធីបុណ្យចូលឆ្នាំថ្មី ប្រពៃណីខ្មែរ ឆ្នាំវក អដ្ឋស័ក ព.ស២៥៦០ ដែលនឹងឈានមកដល់នាពេលខាងមុខនេះ ថ្នាក់ដឹកនាំ មន្ត្រីរាជការនៃសាលាខណ្ឌទួលគោក ដឹកនាំដោយ លោក លី ណារុន អនុប្រធានក្រុមការងារថ្នាក់ជាតិចុះជួយខណ្ឌទួលគោក លោក ឯក ឃុនដឿន អភិបាលខណ្ឌទួលគោក និងលោក ម៉ែន សិរី ប្រធានក្រុមប្រឹក្សាខណ្ឌ នៅព្រឹកថ្ងៃទី៨ មេសា ២០១៦ បាននិមន្តព្រះសង្ឃ សូត្រមន្ត ប្រោះព្រំលើករាសី ដើម្បីសុំពរជ័យ សិរីសួស្តី ជ័យមង្គល វិបុលសុខ ពីទេវតាឆ្នាំថ្មី កើតមានដល់គ្រប់ក្រុមគ្រួសារ និងដល់ទីស្នាក់ការសាលាខណ្ឌទួលគោកទាំងមូល និងសាលាសង្កាត់ទាំង១០ ផងដែរ។
ពិធីសូត្រមន្ត ប្រោះព្រំលើករាសី និងប្រគេនចង្ហាន់ដល់ព្រះសង្ឃនាឱកាសនេះ ក៏បានឧទ្ទិសមហាកុសលជូនទៅដល់បុព្វការីជន មានមាតាបិតា ជីដូនជីតា ញាតិការទាំង៧សណ្តាន ព្រមទាំងដួងវិញ្ញាណក្ខន្ធថ្នាក់ដឹកនាំ មន្ត្រីរាជការ ចំណុះសាលាខណ្ឌទួលគោក និងសង្កាត់ ដែលបានធ្វើមរណ: កាលទៅកាន់លោកខាងមុខហើយនោះ សូមឲ្យបានទៅកាន់សុគតិភពកុំបីឃ្លៀងឃ្លាតឡើយ។ មួយវិញទៀតការជួបជុំថ្នាក់ដឹកនាំ មន្ត្រីរាជការនាឱកាសនេះ ក៏ដើម្បីអបអរសាទរជោគជ័យ នៃការងារធំៗ របស់សាលាខណ្ឌទួលគោក ដែលបានសម្រេចកិច្ចការបំរើដល់ប្រជាពលរដ្ឋ បានយ៉ាងល្អប្រសើរ ក្នុងរយ:ពេលមួយឆ្នាំមកនេះ និងដើម្បីជាការចូលរួមជាមួយប្រជាពលរដ្ឋទូទាំងប្រទេស ក្នុងការរៀបចំពិធីតាមប្រពៃណីទំនៀមទំលាប់ខ្មែរ ទទួលអំណរសាទរទេវតាឆ្នាំថ្មី ព្រះនាម ព្រះនាងបណ្ឌាទេវី ដែលនឹងយាងមកឃុំគ្រងថែរក្សាទឹកដី នៃព្រះរាជាណាចក្រកម្ពុជា នាពេលឆាប់ៗខាងមុខនេះ។
នៅក្នុងឱកាសប្រារព្ធពិធីសូត្រចម្រើនព្រះបរិត ថ្នាក់ដឹកនាំខណ្ឌទួលគោក និងវិទ្យាស្ថានស៊ីតិកក៏បានប្រគេនបច្ច័យចំនួន១លាន៤៤ម៉ឺន៥ពាន់រៀល ដល់វត្តនាគវ័ន សម្រាប់ចូលរួមការកសាងសមិទ្ធផលក្នុងវត្ត និងបានផ្តល់ជូននូវអំណោយមួយចំនួន និងថវិកាម្នាក់២ម៉ឺនរៀល ដល់មន្ត្រីរាជការ ដែលបានមកចូលរួមក្នុងពិធីបុណ្យនេះផងដែរ។
សូមបញ្ជាក់ថា នៅរៀងរាល់ឆ្នាំ នៅមុនពិធីបុណ្យចូលឆ្នាំជិតមកដល់ សាលាខណ្ឌទួលគោក តែងបានធ្វើការណែនាំដល់គ្រប់ស្ថាប័នសាធារណ: ឯកជន នៅក្នុងខណ្ឌ រៀបចំតុបតែងលំអ ភ្លើងពណ៌ ដាក់បដាពាក្យស្លោក ទង់ជាតិ ទង់ជ្វាលា និងរៀបចំគ្រឿងសក្ការបូជាផ្សេងៗ ដើម្បីថ្វាយព្រះរតនត្រ័យ និងដើម្បីទទួលអំណរឆ្នាំថ្មី តាមប្រពៃណី និងទំនៀមទំលាប់របស់ជាតិ។ ពិសេសបងប្អូនប្រជាពលរដ្ឋទាំងអស់ត្រូវយកចិត្តទុកដាក់ និងមានការប្រុងប្រយ័ត្នភ្លើងផ្សែង ព្រោះរដូវនេះជារដូវក្តៅ ដែលងាយមានគ្រោះអគ្គីភ័យកើតឡើង ហើយហាមដាច់ខាត មិនឲ្យមានការលេងល្បែងភ្នាល់ស៊ីសង ការបាញ់ទឹក ជះទឹក គប់ទឹក និងប៉ាតម្សៅជាដើម៕
មតិយោបល់