កំពង់ស្ពឺៈ មុខសញ្ញាសកម្មប្រើប្រាស់ ចែកចាយគ្រឿងញៀនសរុបចំនួន៥នាក់ ត្រូវបានកម្លាំងកងរាជអាវុធហត្ថធ្វើការបង្ក្រាបបន្តបន្ទាប់ក្នុងបន្ទប់ផ្ទះសំណាក់ ជា សួគ៌ កាលពីវេលាម៉ោង៥និង៤០នាទីនាទីល្ងាចថ្ងៃទី៦ ខែកញ្ញា ឆ្នាំ២០១៧ នៅចំណុចភូមិទី៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។

ក្នុងនោះស្នាក់ការសន្តិសុខវាលធំ បានឃាត់ខ្លួនជនសង្ស័យចំនួន២នាក់ ក្នុងករណីចែកចាយគ្រឿងញៀន មានឈ្មោះ លី គន្ធា ភេទស្រី អាយុ២០ឆ្នាំ មុខរបរ មិនពិតប្រាកដ មានទីលំនៅភូមិទី២ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ និងម្នាក់ទៀតឈ្មោះ ហេង ចាន់ស្រីកា ភេទស្រី អាយុ១៨ឆ្នាំ មុខរបរ មិនពិតប្រាកដ មានទីលំនៅ ភូមិទី៣ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ដកហូតវត្ថុតាង ថ្នាំម៉ាទឹកកក១កញ្ចប់។

ក្រោយពីសារភាពជនសង្ស័យទាំង២នាក់ខាងលើថា នៅមានបក្ខពួករបស់ខ្លួនចំនួន៣នាក់ទៀត នៅក្នុងផ្ទះសំណាក់យីហោ ជា សួគ៌ បន្ទប់លេខ១០ ស្ថិតនៅភូមិទី៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ លុះដល់ម៉ោង ៨និង១០នាទីយប់ កម្លាំងអាវុធហត្ថដឹកនាំដោយលោកអនុសេនីយ៍ឯក ទិត្យ វណ្ណះ ប្រធានមន្ទីរយុត្តិធម៌ ដោយមានការសម្របសម្រួល ពីលោក កែវ សុធា ព្រះរាជអាជ្ញា អមសាលាដំបូងខេត្តកំពង់ស្ពឺ ដើម្បីបន្តធ្វើការឆែកឆេរ ផ្ទះសំណាក់ខាងលើបានឃាត់ខ្លួនជនសង្ស័យបានចំនួន៣នាក់ទៀតសម្ងំក្នុងផ្ទះសំណាក់ខាងលើ។

ជនសង្ស័យទាំង៣ដែលសម្ងំក្នុងផ្ទះសំណាក់ ទី១- ឈ្មោះ វ៉ាត វឿន ភេទប្រុស អាយុ២៧ឆ្នាំ មុខរបរ មិនពិតប្រាកដ មានទីលំនៅ ភូមិទី២ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ទី២- ឈ្មោះ ផាន់ សម្ភស្ស ភេទប្រុស អាយុ២០ឆ្នាំ មុខរបរ មិនពិតប្រាកដ មានទីលំនៅភូមិទី៣ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ និងទី៣-ឈ្មោះ ស៊ីម ភារិទ្ធ ភេទប្រុស អាយុ២១ឆ្នាំ មុខរបរ មិនពិតប្រាកដ មានទីលំនៅ ភូមិទី៣ ឃុំត្រែងត្រយឹង ស្រុកភ្នំស្រួចខេត្តកំពង់ស្ពឺ។

បន្ទាប់ពីឆែកឆេក្នុងបន្ទប់ផ្ទះសំណាក់ ដកហូតវត្ថុតាងរួមមាន៖ ទូរសព្ទដៃ៦គ្រឿង ,កាំបិត២ ,កន្ត្រៃ២ ,ថ្នាំញៀនម៉ាទឹកកក៥កញ្ចប់ស្មើរនឹង ១,៦៤ក្រាម និងសម្ភារៈជាច្រើនទៀត។

បច្ចុប្បន្ន ជនសង្ស័យនិងវត្ថុតាងព្រមទាំងសម្ភារៈ ទាំងអស់បានបញ្ជូន មកទីបញ្ជាការដ្ឋានអាវុធហត្ថខេត្តខេត្តកំពង់ស្ពឺ ដើម្បីចាត់ការតាមនីតិវិធីច្បាប់៕