ភ្នំពេញៈ មានករណីគ្រោះថ្នាក់ចរាចរណ៍មួយរវាងរថយន្តកូរ៉េមួយគ្រឿង បើកបរដោយបុរសម្នាក់ បានបុកជាមួយនឹងម៉ូតូម៉ាកធូដេ បើកបរដោយបុរសម្នាក់បណ្តាលឲ្យអ្នកបើកបរម៉ូតូររងរបួសសន្លប់បាត់ស្មារតី ។

ហេតុការណ៍នេះបានកើតទ្បើងកាលពីវេលាម៉ោង៤និង៣០នាទីទៀបភ្លឺថ្ងៃទី៩ ខែកញ្ញា ឆ្នាំ២០១៧ ស្ថិតនៅមុខនឹងក្រុមហ៊ុនតូយ៉ូតា តាមបណ្តោយផ្លូវ សហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ រាជធានីភ្នំពេញ ។

តាមសាក្សីបញ្ជាក់ពីកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូធូដេមួយគ្រឿង ពណ៌ខ្មៅលាយផ្កាឈូក ពាក់ស្លាកលេខ កំពត 1J-8811 បើកបរដោយបុរសម្នាក់វ័យប្រហែលជា២០ឆ្នាំជាង ជិះបញ្ច្រាសទិសដៅចរាចរណ៍បម្រុងនឹងឆ្លងផ្លូវ ក៏មានរថយន្តមួយគ្រឿងមិនចាំម៉ាក បម្រុងនឹងបុក តែសំណាងម៉ូតូគេចមកកៀនទាន់ ក៏វាក់អឺជាមួយនឹងរថយន្តកូរ៉េមួយគ្រឿង ប្រភេទដឹកអីវ៉ាន់ ពណ៌សលាយពណ៌ខៀវ ពាក់ស្លាកលេខ ភ្នំពេញ 3C-7880 បើកបរដោយបុរសម្នាក់វាក់អឺគ្នាជាមួយនឹងម៉ូតូ ក៏បានបុកចំពីមុខពេញទំហឹង ធ្វើឲ្យអ្នកបើកម៉ូតូខ្ទាតមកក្រោមរថយន្តរបួសស្រាល តែសំណាងល្អរថយន្តមិនបន្តដំណើរទៅមុខទៀត ដោយតៃកុងរថយន្តនោះបានចុះមកមើលជនរងគ្រោះ ហើយសែងដាក់លើចិញ្ចើមផ្លូវ ដើម្បីចាំរថយន្តសង្គ្រោះបន្ទាន់មកទទួលយកទៅសង្គ្រោះនៅឯមន្ទីរពេទ្យហុងហាក់ ។

ក្រោយពេលកើតហេតុសមត្ថកិច្ចនៃអធិការដ្ឋាននគរបាលខណ្ឌសែនសុខបានចុះមកដល់ទីកន្លែងកើតហេតុធ្វើការវាស់វែងនឹងរង់ចាំការដោះស្រាយគ្នានៅពេលក្រោយបន្តទៀត៕