ភ្នំពេញៈ តាមសេចក្តីរាយការណ៍ពីភ្នាក់ងារ Post News បានឲ្យដឹងថា មានការភ្ញាក់ផ្អើលយ៉ាងខ្លាំងមួយបានកើតឡើង បន្ទាប់ពីមានរថយន្តម៉ាក ឡិចស៊ីស៤៧០ មួយគ្រឿងបានឆេះយ៉ាងសន្ធោសន្ធៅនៅក្នុងបរិវេណមជ្ឈមណ្ឌលRock ផ្អើលដល់សមត្ថកិច្ចនិងកងកម្លាំងពន្លត់អគ្គិភ័យចុះមកបាញ់ពន្លត់។

ហេតុការណ៍នេះបានកើតឡើងកាពីវេលាម៉ោង២និង៥០នាទីយប់ឈានចូលថ្ងៃទី១១ ខែកញ្ញា ឆ្នាំ២០១៧ ស្ថិតនៅចំណុចមជ្ឈមណ្ឌលកម្សាន្តRock ដែលមានទីតាំងនៅក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។

ប្រភពព័ត៌មានបានបញ្ជាក់ថា រថយន្តដែលឆេះនេះម៉ាកឡិចស៊ីស៤៧០ ពណ៌ខ្មៅ ពាក់ស្លាកលេខ ភ្នំពេញ2I-5911 ហើយមុនពេលកើតហេតុគេបានឃើញអ្នកបើកបររថយន្ត បានបើកមកឈប់កន្លែងចំណតក្នុងបរិវេណមជ្ឈមណ្ឌលRock រួចចូលទៅផឹករាំលេងកម្សាន្តធម្មតា លុះពេលស្រវឹង គាត់ក៏បានចេញមកវិញ ដោយបានកាច់សោបញ្ឆេះម៉ាស៊ីន និងជាន់ហ្គែក៏បណ្តាលឲ្យឆ្លងចរន្តឆេះផ្អើលបែបនេះតែម្តង។ តែសំណាងល្អណាស់គ្មាននរណាម្នាក់រងរបួសនោះទេ៕