ភ្នំពេញៈ រថយន្តម៉ាកហាយឡែនឌ័រ មួយគ្រឿង បើកបរដោយស្ត្រីម្នាក់ បានបត់មិនប្រយ័ត្ន ក៏ត្រូវរម៉កដឹកសាច់មាន់អកហ្សឺចាប់ហ្វ្រាំងមិនទាន់ជ្រុលចង្កូតបុកកៀរកំពិតទ្វារម្ខាង កាលពីវេលាម៉ោង ២និង២០នាទីរសៀល ថ្ងៃទី១២ ខែកញ្ញា ឆ្នាំ២០១៧ ស្ថិតតាមបណ្តោយផ្លូវខាងសារិនកែងផ្លូវបេតុង ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។

រថយន្តបង្កម៉ាកហាយឡែនឌ័រ ពណ៌ទឹកមាស ពាក់ស្លាកលេខ ភ្នំពេញ 2AP-6728 រងការខូចខាតកំពិតផ្នែកមុខខាងឆ្វេង អ្នកបើកបរមិនត្រូវបានគេស្គាល់ឈ្មោះទេ។ រីឯអ្នកបើកបររម៉កដឹកសាច់មាន់មិនត្រូវបានគេស្គាល់ឈ្មោះនោះដែរ។

ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញរថយន្តម៉ាកហាយឡែនឌ័របើកបរដោយស្ត្រីម្នាក់តាមផ្លូវបេតុងក្នុងទិសដៅពីលិចទៅកើត ខណៈដែលមកដល់ចំណុចកើតហេតុរថយន្តបើកបរក្នុងក្នុងល្បឿនលឿនគួរសម លុះមកដល់ចំណុចកើតហេតុបានបើកបត់ឆ្វេង ស្របពេលនោះ ក៏មានរម៉កដឹកសាច់មាន់ មួយគ្រឿងបើកបរតាមផ្លួវខាងសារិនក្នុងទិសដៅពីជើងទៅត្បូង ក្នុងល្បឿនគួរសម ហើយក៏អកហ្សឺចាប់ហ្វ្រាំងមិនទាន់ក៏ជ្រុលចង្កូតទៅបុកកៀរទ្វារចំហ៊ាងខាងឆ្វេងបណ្តាលអោយរថយន្តរងការខូចខាតកំពិតទ្វារមុខខាងឆ្វេងយ៉ាងដំណំ។

ក្រោយកើតហេតុភាគីទាំងសងខាងកំពុងធ្វើការសម្របសម្រួលនៅកន្លែងកើតហេតុនៅឡើយដោយភាគីខាងរថយន្តបង្កទាមទារសំណង៕