សៀមរាប: ពលរដ្ឋភ្ជួរនៅខេត្តសៀមរាប ពេលកំពុងភ្ជួរដីដាំដំឡូងបានប្រទះឃើញគ្រាប់មិនទាន់ផ្ទុះចំនួន៣០គ្រាប់ដែលលបន្សល់ទុកតាំងពីសម័យសង្គ្រាមនៅក្នុងចម្ការរបស់ខ្លួនរួចក៏បានរាយការយ៍ទៅសមត្ថកិច្ចឃុំខ្វាវដើម្បីជួយអន្តរាគមន៍។

ហេតុការណ៍ប្រទះឃើញនេះ កើតឡើងកាលពីវេលាម៉ោង៩ព្រឹក ថ្ងៃទី២ ខែមិថុនាឆ្នាំ ២០១៦ នៅចំណុចខាងជើងភ្នំក្សាក ភូមិសាស្ត្រឃុំខ្វាវ ស្រុកជីក្រែងខេត្តសៀមរាប។ បើតាមលោកវរសេនីយ៍ត្រី សុខ សុទ្ធាវុធ អធិការនគបាលស្រុកជីក្រែង បានឲ្យដឹងនៅរសៀលថ្ងៃ០២នេះថា ម្ចាស់ចម្ការមានឈ្មោះញ៉ូវ ព្រិចភេទប្រុស នៅភូមិខ្វាវ ឃុំខ្វាវបានទៅភ្ជួរដីដាំដំឡូងនៅចំណុចខាងជើងភ្នំក្សាកភូមិសាស្ត្រឃុំខ្វាវបាប្រទះឃើញគ្រាប់មិនទាន់ផ្ទុះចំនួន៣០គ្រាប មានគ្រាប់B៤០កន្លះចំនួន២១គ្រាប់ និងគ្រាប់៦២ចំនួន៩គ្រាប់ ហើយបានទាក់ទងអង្គភាពស៊ីម៉ាកដើម្បីយកទៅកម្ទេចចោល។

លោកបន្តទៀតថា តាមការសាកសួរម្ចាស់ចម្ការបានប្រាប់ថា ចម្ការរបស់គាត់មិនដែលធ្វើនោះទេគាត់ទុកចោលតាំងពីសម័យសង្គ្រាមមកម្លេះហើយនៅពេលភ្ជួរស្រាប់តែប្រទះឃើញគ្រាប់ជាច្រើនតែម្ដង។ លោកបន្ថែមថាបច្ចុប្បន្នខាងអង្គភាពស៊ីម៉ាកបានចុះមកប្រមូលដើម្បីយកទៅកម្ទេចចោល៕