ភ្នំពេញៈ តាមសេចក្តីរាយការណ៍ពីភ្នាក់ងារ Post News បានឲ្យដឹងថា មានករណីគ្រោះថ្នាក់ចរាចរណ៍មួយបង្កឡើងដោយរថយន្តម៉ាកស៊ីណា ពណ៌ស មួយគ្រឿង ខ្វះការប្រុងប្រយត្ន័ទៅបុករម៉កអេតចាយ បណ្តាលឲ្យមនុស្សចាស់ក្មេង ២នាក់ឪពុកកូន រងរបួសធ្ងន់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង៣និង៥០នាទី ទាបភ្លឺឈានចូលថ្ងៃទី១៧ ខែកញ្ញា ឆ្នាំ២០១៧ ស្ថិតនៅចំណុច ផ្លូវ២៩៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

យោងតាមប្រភពព័ត៌មានបានឲ្យដឹងថា មុនពេលកើតហេតុគេឃើញ បុរសជនជាតិកូរ៉េម្នាក់ បើករថយន្តម៉ាកស៊ីណា ពណ៌ស ពាក់ស្លាកលេខ ភ្នំពេញ 2AK-7128 បើកបរក្នុងល្បឿនលឿន ទិសដៅពីលិចទៅកើត លុះបានមកដល់ចំណុចកើតហេតុ ក៏បានជ្រុលចង្កូតបុករម៉កអេតចាយ ពេញទំហឹង បណ្តាលឲ្យមនុស្សចាស់ក្មេង ២នាក់ឪពុកកូនរងរបួសធ្ងន់ត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យតែម្តង។

ក្រោយកើតហេតុ សមត្ថកិច្ចចុះមកវាស់វែងយករថយន្តនិងរទេះអូសអេតចាយ ទៅរក្សាទុករង់ចាំដោះស្រាយគ្នាតាមផ្លូវច្បាប់បន្តទៀត៕