ភ្នំពេញៈ បុរសម្នាក់ជាអ្នកបើកកង់បី រួមដំណើរជាមួយមិត្តភក្តិ២នាក់ទៀត ហើយតៃកុងកង់បីនោះ មានស្ថានភាពស្រវឹងផងនោះ បានជ្រុលចង្កូតទៅបុករថយន្តទ្បិចស៊ីស ៤៧០ ដែលចតចោលបញ្ច្រាសទិសដៅចរាចរណ៍។

ហេតុការណ៍នេះកើតទ្បើងកាលពីវេលាម៉ោង ៩និង៤៥នាទីយប់ ថ្ងៃទី២៦ ខែកញ្ញា ឆ្នាំ២០១៧ ស្ថិតនៅតាមបណ្តោយផ្លូវ២០០៤ សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា​មុនពេលកើតហេតុ គេឃើញបុរសម្នាក់ជាតៃកុងកង់បី រួមដំណើរជាមួយមិត្តភក្តិ២នាក់ទៀត ទើបចេញពីផឹកស៊ី ដោយតៃកុងកង់បីនោះមានស្ថានភាពស្រវឹងស្រឿងៗ ហើយក៏បានរេចង្កូតមកបុកនឹងរថយន្តទ្បិចស៊ីស៤៧០ ពណ៌ខ្មៅ ពាក់ស្លាកលេខ 2I-1835 ដែលចតបញ្ច្រាសទិសដៅចរាចរណ៍បណ្តាលឲ្យរងការខូចខាតផ្នែកខាងមុខរថយន្តបន្តិចបន្តួច។ ចំណែកកង់បីរងការខូចខាតផ្នែកខាងមុខបន្តិចបន្តួចដូចគ្នា ។

ក្រោយពេលកើតហេតុសមត្ថកិច្ចក៏បានមកដល់កន្លែងកើតហេតុ ឲ្យភាគីទាំងសងខាងសម្រួលគ្នាមួយជំហានសិន រួចក៏យល់ពីកំហុសរៀងខ្លួនដោយបានសុំទោសគ្នាបញ្ចប់រឿងតែម្តង៕