ភ្នំពេញៈ បុរសដែលជាជនសង្ស័យម្នាក់ពាក់ព័ន្ធទៅនឹងចោរកម្ម ត្រូវបានសមត្ថកិច្ចប៉ុស្តិ៍ចោមចៅចាប់ខ្លួនបាន បន្ទាប់ពីមានការសហការពីជនរងគ្រោះកាលពីវេលាម៉ោង៤រសៀល ថ្ងៃទី២៧ ខែកញ្ញា ឆ្នាំ២០១៧ ស្ថិតនៅក្នុងបន្ទប់ជួលមួយកន្លែង ស្ថិតក្នុងភូមិ ជ្រៃកោង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ដោយជាប់ពាក់ព័ន្ធទៅនឹងករណីលួចទូរសព្ទ ដល់ចាប់បានរកឃើញទាំងថ្នាំញៀន និងឧបករណ៍ដបសម្រាប់ជក់ថ្នាំមួយកំប្លេរថែមទៀត។

បុរសដែលជាជនសង្ស័យខាងលើមានឈ្មោះ ចាន់ សំណាង ភេទប្រុស អាយុ២៣ឆ្នាំ មុខរបរចាប់ម៉ូយឡាន នៅចំណតរថយន្តចោមចៅ ស្នាក់នៅភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតនៅ ឃុំវាល ស្រុកគងពិសី ខេត្តកំពង់ស្ពឺ ។

តាមការបកស្រាយរបស់ជនរងគ្រោះ ដែលជាម្ចាស់ទូរសព្ទ តែមិនបានបញ្ចេញឈ្មោះបានបញ្ជាក់ឲ្យដឹងថា កាលពីវេលាម៉ោង៤ព្រឹក ថ្ងៃទី២៧ ខែកញ្ញា ឆ្នាំ២០១៧ ជនសង្ស័យបានទៅធ្វើសកម្មភាពលូចយកទូរសព្ទដៃម៉ាក ហូវ៉ៃមួយគ្រឿង តាមបង្អួច ហើយរត់គេចខ្លួន តែតាមការពិនិត្យមើល តាមរយៈកាម៉េរ៉ាសុវត្ថិភាពដែលដាក់នៅផ្ទះជួលនោះ គឺភិនភាគរបស់បុរសខាងលើគឺស្គាល់ច្បាស់ណាស់ ព្រោះជាអ្នកស្នាក់នៅក្បែរខាងគ្នា លុះរហូតដល់ ល្ងាចថ្ងៃទី២៧ ខែកញ្ញា ឆ្នាំ២០១៧ ក៏ជនរងគ្រោះបានមកប្តឹងសមត្ថកិច្ចប៉ុស្តិ៍ឲ្យចុះទៅឃាត់សួរនាំស្រាប់តែប្រទះឃើញគ្រឿងញៀន និងសម្ភារៈឧបករណ៍ជក់ថ្នាំមួយកំប្លេរថែមទៀតទើបសមត្ថកិច្ចឃាត់ខ្លួននាំចូលប៉ុស្តិ៍រដ្ឋបាលចោមចៅតែម្តង។

ជនរងគ្រោះបន្តទៀតថា រូបគាត់គិតថាមិនប្តឹងរឿងទូរសព្ទនោះឡើយ ខណៈដែលស៊ីមទូរសព្ទរបស់គាត់បានឲ្យក្រុមហ៊ុនបិទផ្តាច់អស់ហើយ ទុកឲ្យសមត្ថកិច្ចចាត់ការ រឿងគ្រឿងញៀនចុះ ។

តាមសម្តីជនសង្ស័យបានឲ្យដឹងថា ខ្លួនពិតជាបានលួចទូរសព្ទ របស់ជនរងគ្រោះមែន រួចមកបានយកទៅលក់ នៅម្តុំផ្សារចោមចៅទាំងយប់ រួចមកបានលុយក៏យកទៅទិញថ្នាំញៀនតែម្តង ហើយថែមទាំងយកលុយនោះទៅស៊ីផឹកអស់ហើយ។

ពាក់ព័ន្ធទៅនឹងករណីលួចទូរសព្ទ ចាប់បានប្រទះឃើញគ្រឿងញៀន សមត្ថកិច្ចឃាត់ខ្លួនជនសង្ស័យ បន្ទាប់ពីរកឃើញថ្នាំញៀន១កញ្ចប់ និងសម្ភារៈមួយចំនួនទៀត ដើម្បីបន្តសាកសួរនិងកសាងសំណុំរឿងបញ្ជូនទៅផ្នែកជំនាញអធិការដ្ឋាន ចាត់ការបន្តទៅតាមនីតិវិធីច្បាប់៕