ភ្នំពេញៈ បុរសម្នាក់បានរងរបួសធ្ងន់ធ្ងរដោយសារតែត្រូវរថយន្ដបុកពេញទំហឹង បណ្ដាលឲ្យប៉ើងខ្ទាតជិត១០ម៉ែត្រ កាលពីវេលា​ម៉ោង​១១និង៣០នាទីយប់​ ថ្ងៃទី០៣​ ខែមិថុនា​ ឆ្នាំ​២០១៦​ នៅតាមបណ្ដោយមហាវិថីព្រះនរោតម្ដកែង និងផ្លូវលេខ១០៦​ ស្ថិតក្នុងសង្កាត់​ វត្តភ្នំ​ ខណ្ឌដូនពេញ​ រាជធានីភ្នំពេញ។ ​

ព្រភពព័ត៌មានពីកន្លែងកើតហេតុបានឲ្យដឹងថា ​នៅពេលកើតហេតុគេឃើញជនរងគ្រោះជិះម៉ូតូមួយគ្រឿងម៉ាកហុងដាសង់កូរ៉េ​ ពណ៌ក្រហម​ ពាក់ស្លាកលេខ​ភ្នំពេញ​ 1AG 8490 ជិះម្នាក់ឯងធ្វើដំណើរតាមបណ្ដោយមហាវិថីព្រះនរោតម្ដទិសដៅពីត្បូងទៅជើង​ ពេលមកដល់ចំណុចកើតហេតុស្រាប់តែមានរថយន្ដមួយគ្រឿងម៉ាក RAV4​ ពណ៌ទឹកប្រាក់​ ពាក់ស្លាកលេខ​ ភ្នំពេញ​2AF 2351 បើកបរដោយបុរសជនជាតិកូរ៉េ និងរួមជាមួយនារីខ្មែរម្នាក់​ ដោយធ្វើដំណើរតាមបណ្ដោយផ្លូវលេខ១០៦​ ទិសដៅពីកើតទៅលិចយ៉ាងលឿនបំណងឆ្លងមហាវិថីព្រះនរោតម្ដមិនប្រយ័ត្នក៏ជ្រុលបុកម៉ូតូពេញទំហឹង បណ្ដាលឲ្យម៉ូតូអូសជិ១០ម៉ែត្រ និងម្ចាស់ម៉ូតូរងរបួសបែកមុខបែកមាត់រងរបួសធ្ងន់ធ្ងរ។

ក្រោយពេលកើតហេតុ កម្លាំងសមត្ថកិច្ចបានចុះដល់កន្លែងកើតហេតុ ​ហើយធ្វើការសម្របសម្រួលគ្នាដោយភាគីខាងរថយន្តព្រមសងថ្លៃការខូចខាត និងព្យាបាលរបួសទៅឲ្យភាគីរងគ្រោះចំនួន២៧០ដុល្លារ​ ដើម្បីបញ្ចប់រឿងនៅកន្លែងកើហេតុតែម្ដង ព្រោះមិនចង់មានរឿងវែងឆ្ងាយ និងមិនចង់រំខានដល់សមត្ថកិច្ច​ ផងដែរនោះ៕