ក្រចេះ: ជនសង្ស័យម្នាក់ ត្រូវបានសមត្ថកិច្ចឃាត់ខ្លួន ពាក់ព័ន្ធនឹងករណីហិថ្សាក្នុងគ្រួសារ។

ហេតុការណ៍កើតឡើងនៅវេលាម៉ោង៤នាទីរសៀល ថ្ងៃទី២៩ ខែកញ្ញា ឆ្នាំ២០១៧ នៅភូមិគ្រញូងសែនជ័យជើង ឃុំគ្រញូងសែនជ័យ ស្រុកស្នួល ខេត្តក្រចេះ។

បង្កឡើងដោយប្តីឈ្មោះ រិន ណាំ អាយុ២៧ឆ្នាំ បានធ្វើសកម្មភាព វាយដោយដៃទៅលើជនរងគ្រោះជាប្រពន្ធឈ្មោះ ប៊ុន ស៊ីណា អាយុ២៥ឆ្នាំ ស្នាក់នៅភូមិឃុំកើតហេតុខាងលើ ត្រូវចំភ្លៅ ទាំងសងខាង បណ្តាលឲ្យមានស្នាម ហើមជាំ ។

មូលហេតុជនសង្ស័យខឹងប្រពន្ធរបស់ខ្លួនទៅលេងស្រុកកំណើតពេលបុណ្យភ្ជំ ហើយខ្លួនបានតេហៅប្រពន្ធមកផ្ទះវិញ តែប្រពន្ធមិនព្រមមកលុះដល់ថ្ងៃកើតហេតុខាងលើ ពេលប្រពន្ធមកដល់ផ្ទះខ្លួនក៏បានធ្វើសកម្មភាពវាយប្រពន្ធតែម្តង ។

រហូតដល់ថ្ងៃទី៣០ខែឆ្នាំដដែល ជនរងគ្រោះឈ្មោះ ប៊ុន ស៊ីណា បានមកដាក់ពាក្យបណ្តឹង នៅប៉ុស្តិ៍នគរបាលគ្រញូងសែនជ័យ បន្ទាប់មកកម្លាំងប៉ុស្តិ៍គ្រញូងសែនជ័យ ក៏បានហៅនាំជនសង្ស័យ បញ្ជូនមកកាន់អធិការដ្ឋាននគរបាលស្រុកស្នួល តែម្តង (ដោយភាគីខាងប្រពន្ធសូមសំណូមពរឲ្យសមត្ថកិច្ចអនុវត្តតាមផ្លូវច្បាប់)។

បច្ចុប្បន្នជនសង្ស័យ ត្រូវបានឃាត់ខ្លួនបណ្នោះអាសន្ន នៅអធិការដ្ឋាននគរបាលស្រុកស្នួល ដើម្បីកសាងសំណុំរឿងទៅការិយាល័យជំនាញខេត្ត ចាត់ការបន្តតាមនីតិវិធី៕