កំពង់ឆ្នាំងៈ លោកអនុសេនីយ៍ឯក ហង្ស ប៊ុនថា អធិការរងស្រុកសាមគ្គីមានជ័យ ទទួលបន្ទុកផ្នែកចរារចណ៍ បានប្រាប់ Post News ថា មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តក្រុង ក្រុមហ៊ុនរិទ្ធមុន្នី បុកម៉ូតូពេញទំហឹង បណ្តាលឲ្យមនុស្ស៣នាក់រងរបួសធ្ងន់ ក្នុងនោះមានព្រះសង្ឃ២អង្គ សុគត១អង្គពេលបញ្ជូនទៅមន្ទីរពេទ្យ។

ហេតុការណ៍កើតឡើងនៅវេលាម៉ោង ២និង៤៥នាទីរសៀល ថ្ងៃទី១ ខែតុលា ឆ្នាំ២០១៧ ស្ថិតនៅលើផ្លូវជាតិលេខ៥ ចន្លោះគីឡូម៉ែត្រ៤០-៤១ នៅក្នុង​ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។

លោកអនុសេនីយ៍ឯក ហង្ស ប៊ុនថា អធិការរងស្រុកសាមគ្គីមានជ័យ បានបន្តថា នៅមុនពេលកើតហេតុ គេមានឃើញមានរថយន្តក្រុង ក្រុមហ៊ុនរិទ្ធមុន្នី ពាក់ស្លាកលេខ ភ្នំពេញ3C-7994 (អ្នកបើកបររត់គេចខ្លួន) លុះមកដល់ចំណុចកើតហេតុ ស្រាប់តែមានម៉ូតូ១គ្រឿង ម៉ាកហុងដា ពណ៌ខ្មៅ ​ស៊េរីឆ្នាំ២០១៣ ពាក់ស្លាកលេខ កំពង់ឆ្នាំង1C-8256 ក្នុងទិសដៅស្របគ្នា បានវ៉ារថយន្ត១គ្រឿងទៀត ហើយទៅប៉ះគូថរថយន្ត ដួលចូលក្រោមរថយន្តក្រុង បណ្តាលឲ្យអ្នកបើកបរម៉ូតូឈ្មោះ ឯ ឧត្តម ភេទប្រុស អាយុ២១ឆ្នាំ ស្នាក់នៅឃុំខ្នាឆ្មារ ស្រុកសាមគ្គីមានជ័យ រងរបួសធ្ងន់ និងព្រះសង្ឃ២អង្គ របួសធ្ងន់១អង្គនិង១អង្គទៀតសុគតពេលបញ្ជូនទៅដល់មន្ទីរពេទ្យ។

ក្រោយពេលកើតហេតុ សមត្ថកិច្ចបានចុះទៅដល់កន្លែងធ្វើការវាស់វែង និងនាំយកម៉ូតូនិងរថយន្តទាំង២គ្រឿង មករក្សាទុករង់ចាំការដោះស្រាយគ្នាពេលក្រោយ៕