ភ្នំពេញៈ យោងតាមការឲ្យដឹងរបស់សមត្ថកិច្ច នាយកដ្ឋានព្រហ្មទណ្ឌកម្រិតធ្ងន់នៃក្រសួងមហាផ្ទៃ នៅរសៀលថ្ងៃទី២ ខែតុលា ឆ្នាំ២០១៧នេះ តុលាការក្រុងភ្នំពេញ បានសម្រេចផ្ទេរសមត្ថកិច្ច សំណុំរឿងបង្ខាំងមនុស្សខុសច្បាប់ និងគំរាមទារប្រាក់ ដែលមានជនសង្ស័យជា ជនជាតិវៀតណាម ៦នាក់ ទៅឱ្យតុលាការខេត្តប៉ៃលិនជាអ្នកចាត់ការវិញ។

សមត្ថកិច្ច អះអាងថា ការសម្រេចរបស់តុលាការភ្នំពេញបែបនេះដោយសារតែ ទីតាំងប្រព្រឹត្តបទល្មើសស្ថិតនៅក្នុងខេត្តប៉ៃលិន។

ជនសង្ស័យ៦នាក់ដែលពាក់ព័ន្ធរឿងបង្ខាំងមនុស្សខុសច្បាប់ និងគំរាមទានប្រាក់ មានដូចខាងក្រោម៖
ទី១-ឈ្មោះ ហ្វាម ហ៊ុងយ៉ុង ហៅ គឿង ភេទប្រុសអាយុ៤៣ឆ្នាំ ជនជាតិវៀតណាម ។
ទី២-ឈ្មោះ យ៉ ហុងវ៊ឹង ភេទប្រុស អាយុ ៣៣ឆ្នាំ ជនជាតិវៀតណាម ។
ទី៣-ឈ្មោះ គឹម ឡាង ភេទស្រីអាយុ៥១ឆ្នាំ ជនជាតិវៀតណាម ។
ទី៤-ឈ្មោះ កាវ ទ្រីលិន ភេទស្រី អាយុ ៣៣ឆ្នាំ ជនជាតិវៀតណាម ។
ទី៥-ឈ្មោះ ជិន ឆិកញើ ភេទស្រី អាយុ៣០ឆ្នាំ ជនជាតិវៀតណាម និងទី៦-ឈ្មោះ តាំង ឌឹកវ៉ូ ភេទប្រុស អាយុ ២៧ឆ្នាំ ជនជាតិវៀតណាម ។

សូមបញ្ជាក់ថា កម្លាំងសមត្ថកិច្ចនាយកដ្ឋានព្រហ្មទណ្ឌកម្រិតធ្ងន់ នៃក្រសួងមហាផ្ទៃ បានបញ្ជូនជនសង្ស័យទាំង៦នាក់ ទៅកាន់អយ្យការអមសាលាដំបូងរាជធានីភ្នំពេញ កាលពីព្រឹកថ្ងៃទី០១ ខែតុលា ឆ្នាំ២០១៧ កន្លងទៅ
ពាក់ព័ន្ធរឿងបង្ខាំងមនុស្សខុសច្បាប់ និងគំរាមទារប្រាក់ប្រព្រឹត្តកាលពីថ្ងៃទី២៨ ខែកញ្ញា ឆ្នាំ២០១៧ នៅក្នុងបន្ទប់លេខ៦០១១ ស្ថិតនៅភូមិផ្សារព្រំ ឃុំស្ទឹងកាច់ ស្រុក សាលាក្រៅ ខេត្ដប៉ៃលិន ។

យោងតាមរបាយការណ៍នគរបាលព្រហ្មទណ្ឌកម្រិតធ្ងន់បានបញ្ជាក់ថា កាលពីថ្ងៃទី២៧ ខែកញ្ញ ឆ្នាំ២០១៧ ករិយាល័យព្រហ្មទណ្ឌកម្រិតធ្ងន់បានទទួលពាក្យបណ្ដឹងផ្ទាល់ម៉ាត់ពីឪពុកជនរងគ្រោះឈ្មោះ វឹង យ៉ាងតឹង ថាកូនប្រុសរបស់គាត់ត្រូវគេចាប់បង្ខាំងនិងគំរាមទារប្រាក់ចំនួន១៥,៤០០០ដុល្លារ (មួយម៉ឺនប្រាំពាន់បួនរយដុល្លារអាមេរិក) ជាថ្នូរនិងការដោះលែង ហើយឪពុកជនរងគ្រោះបានផ្ញើរលុយចំនួន៥០០០ដុល្លារ (ប្រាំពាន់ដុល្លារអាមេរិក) ម្ដងរួចមកហើយ ប៉ុន្ដែពួកគេមិនព្រមដោះលែងកូនរបស់គាត់ រហូតដល់ថ្ងៃទី២៨ ខែកញ្ញា ឆ្នាំ២០១៧ នាយកដ្ឋាននគរបាលព្រហ្មទណ្ឌបានធ្វើការស្រាវជ្រាវនិង សហការជាមួយស្នងការដ្ឋាននគរបាលខេត្ដប៉ៃលិនឃាត់ខ្លួនបានជនសង្ស័យ៣នាក់ជាជនជាតិវៀតណាម និងបន្ដតាមចាប់បានតៃកុងតាក់ស៊ីម្នាក់ជនជាតិខ្មែរ នៅកន្លែងវីង ហើយបានបន្ដទៅឃាត់ខ្លួនជនសង្ស័យជាបន្ដបន្ទាប់បានចំនួន៩នាក់ទៀតជាជនជាតិវៀតណាម ហើយបានដោះលែងជនរងគ្រោះដោយសុវត្ថិភាព។

ក្រោយពេលសាកសួរលើជនសង្ស័យទាំង១៣នាក់នោះឃើញថាមានការពាក់ព័ន្ធក្នុងករណីបង្ខាំងមនុស្សខុសច្បាប់ និងគំរាមទារប្រាក់មាន គ្នា៦នាក់ ដោយឡែកជនសង្ស័យ ៧នាក់ផ្សេងទៀតពិនិត្យឃើញថាពុំមានពាក់ព័ន្ធ នាយកដ្ឋាននគរបាលព្រហ្មទណ្ឌបានប្រគល់ទៅឲ្យនាយកដ្ឋានអន្ដោប្រវេសន៍ចាត់ការតាមច្បាប់អន្តោប្រវេសន៍៕

https://youtu.be/N51hUKGct5g