តាកែវ: យុវជនម្នាក់ ត្រូវបានសមត្ថកិច្ចឃាត់ខ្លួន ពាក់ព័ន្ធនឹងករណីរំលោភសេពសន្ថវ:។
ហេតុការណ៍កើតឡើងនៅវេលាម៉ោង១យប់ រំលងអធ្រាត្រ ឈានចូលថ្ងៃទី៨ ខែតុលា ឆ្នាំ២០១៧ នៅភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ។

សមត្ថកិច្ចបានឲ្យដឹងថា ជនសង្ស័យមានឈ្មោះ យិន យី ភេទប្រុស អាយុ១៨ឆ្នាំ មុខរបរ មិនពិតប្រាកដ ស្នាក់នៅភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ។ ចំណែកជនរងគ្រោះមានឈ្មោះ រ.ដ.ឡ ភេទស្រី អាយុ១១ឆ្នាំ ស្នាក់នៅភូមិឃុំកើតហេតុខាងលើ។

ប្រភពដដែលបន្តថា នៅ​ពេលកើតហេតុ ជនសង្ស័យបានផ្លោះរបងចូល​ទៅក្នុងផ្ទះជនរងគ្រោះហើយបានធ្វើសកម្មភាពបង្ខំចាប់រំលោភ ព្រមទាំងគំរាមកំហែងថាបើហ៊ានមាត់ប្រាប់ឪពុកម្តាយ នឹងសម្លាប់ចោល ក្រោយពេលធ្វើសកម្មភាពរួចជនសង្ស័យបានរត់គេចបាត់។
លុះមកដល់ថ្ងៃទី៩​ ខែឆ្នាំដដែល នៅវេលាម៉ោង៤រសៀល កម្លាំងសមត្ថកិច្ចបានឃាត់ខ្លួនជនសង្ស័យយកមកអធិការដ្ឋាននគរបាលស្រុកបាទី ដើម្បីធ្វើការសាកសួរ៕