សៀមរាបៈ យោងតាមផេកការិយាល័យផ្សព្វផ្សាយតាមបណ្តាញសង្គមបានឲ្យដឹងថា នៅយប់ថ្ងៃទី២២ ខែកក្កដា ឆ្នាំ២០២០ កម្លាំងចម្រុះនៃគណៈបញ្ជាការឯកភាពក្រុងសៀមរាប សហការជាមួយ ក្រុមការងារអធិការកិច្ចនៃមន្ទីរទេសចរណ៍ខេត្តសៀមរាប បានចុះ​ល្បាត​ត្រួតពិនិត្យ និង​ ធ្វើការផ្អាកសកម្មភាពទីតាំងមណ្ឌលកម្សាន្តទេសចរណ៍មនុស្សពេញវ័យ (ខារ៉ាអូខេ KTV)ចំនួន០៣កន្លែង :
១.ខារ៉ាអូខេ ម៉ាយ វ៉យ My Voice KTV
២.ខារ៉ាអូខេ ពន្លឺ គ្រួសារ Ponleu Krousar KTV
៣. ខារ៉ាអូខេ សំនៀងគ្រួសារ Samnieng Krousar KTV

មណ្ឌលកម្សាន្តទេសចរណ៍មនុស្សពេញវ័យទាំង ៣កន្លែងនេះ មានទីតាំងនៅភូមិស្វាយដង្គំ សង្កាត់ស្វាយដង្គំ ក្រុងសៀមរាប ។
ក្រោយធ្វើការត្រួតពិនិត្យ ជាលទ្ធផលគឺមិនមានច្បាប់អនុញ្ញាតអាជីវកម្ម ហើយលួចបើកអាជីវកម្ម​ ល្មើសនឹងបទបញ្ជារបស់រាជរដ្ឋាភិបាល និងសេចក្តីណែនាំរបស់រដ្ឋបាលខេត្តសៀមរាប ក្នុងដំណាក់កាលនៃការបង្ការ និងទប់ស្កាត់ការរីករាលដាលនៃជំងឺកូវីដ១៩។

ដោយមានគោលការណ៍ពីថ្នាក់ដឹកនាំ ក្រុមការងារចម្រុះ​ បានធ្វើកំណត់ហេតុកិច្ចសន្យាណែនាំអោយម្ចាស់អាជីវកម្មផ្អាកអាជីវកម្មរបស់ខ្លួន ហើយត្រូវដាក់ពាក្យស្នើស៉ំច្បាប់អនុញ្ញាតុអោយបានត្រឹមត្រូវ រហូតដល់មានការណែនាំរបស់រាជរដ្ឋាភិបាលជាថ្មី ទើបអាចបើកដំណើរការអាជីវកម្មបានឡើងវិញ៕