​ស្ទឹងត្រែងៈ ករណីដ៏រន្ធត់មួយបានកើតឡើង ក្រោយពីបុរសម្នាក់ត្រូវដើមឈើរុញច្រាញ់បុក បណ្តាលឲ្យស្លាប់នៅនឹងកន្លែង។
ហេតុការណ៍កើតឡើងនៅវេលាម៉ោង១០ និង១៥នាទីព្រឹក ថ្ងៃទី១០ ខែតុលា ឆ្នាំ២០១៧ ស្ថិតនៅភូមិស្វាយរៀង ឃុំតាឡោក ស្រុកសេសាន ខេត្តស្ទឹងត្រែង។

សមត្ថកិច្ចបានឲ្យដឹងថា ជនរងគ្រោះមានឈ្មោះ ឡន ណក ភេទប្រុស អាយុ៣១ឆ្នាំ មានប្រពន្ធឈ្មោះ ហា ការុត អាយុ២៧ឆ្នាំ ស្នាក់នៅភូមិស្វាយរៀង ឃុំតាឡោក ស្រុកសេសាន ខេត្តស្ទឹងត្រែង។

ប្រភពដដែលបន្តថា នៅមុនពេលកើតហេតុ ២នាក់ប្តីប្រពន្ធខាងលើ បាននាំគ្នាទៅចម្ការគោលបំណងទៅផ្តួលដើមឈើ ដើម្បីផែក្តារផ្ទះខ្លួនឯង ជនរងគ្រោះបានយកម៉ាស៊ីនត្រង់ស៊ីន័រយកទៅផ្តួលដើមខ្លុងនោះ តែដើមបានដួលទៅទើរលើដើមឈើមួយទៀត ហើយដើមខ្លុងដែលបានដួលក៏រុញច្រានថយក្រោយ បុក​ជនរងគ្រោះត្រូវចំខាងខ្នង ឆ្អឹងចំណីផ្កាប់មុខ បណ្តាលឲ្យស្លាប់ភ្លាមៗនៅនឹងកន្លែង។

សាកសពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕