ភ្នំពេញ: មានគ្រោះថ្នាក់ចរាចរណ៍ដ៏រន្ធត់មួយបានកើតឡើងខណ:បុរសពីរនាក់ជិះម៉ូតូមួយគ្រឿងទៅបុកកង់រថយន្តហ៊ីយ៉ាន់ដាយសណ្តោងរ៉ឺម៉កបណ្តាលឲ្យម្នាក់រងរបួសធ្ងន់និងម្នាក់ទៀតស្លាប់ភ្លាមៗ។

ហេតុកាតណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងកាលពីវេលាម៉ោង៣និង៥០នាទីរសៀល ថ្ងៃទី១០ ខែតុលា ឆ្នាំ២០១៧ ស្ថិតតាមបណ្តោយផ្លូវជាតិលេខ៥ កែងផ្លូវអក្សរតេ(ផ្លូវទៅភ្នំបាសិដ្ឋ) ក្នុងភូមិព្រែកព្នៅ សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

ជនរងគ្រោះរហូតដល់បាត់បង់ជីវិតនោះមានឈ្មោះ ហាប់ គ្រីយ៉ា អាយុ២២ឆ្នាំមានទីលំនៅភូមិស្វាយបាកាន់ ឃុំតាជេស ស្រុកកំពង់ត្រឡាច ខេត្តកំពង់ឆ្នាំង។

រីឯជនរងគ្រោះម្នាក់ទៀតដែលរងរបួសធ្ងន់មិនត្រូវបានស្គាល់អត្តសញ្ញាណឡើយអ្នកទាំងពីរជិះម៉ូតូម៉ាកNex ពណ៌ស ពាក់ស្លាកលេខ កំពង់ឆ្នាំង1G 4596។

ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថានៅមុនពេលកើតហេតុមានរថយន្តមួយគ្រឿងម៉ាកហ៊ីយ៉ាន់ដាយសណ្តោងរ៉ឺម៉កពណ៌ស្លាទុំពាក់ស្លាក់លេខនៅកន្ទុយរ៉ឺម៉កព្រះសីហនុ4A 1726 និងក្បាលរថយន្តពាក់ស្លាកលេខភ្នំពេញ3D 4607 បើកបរតាមបណ្តោយផ្លូវជាតិលេខ៥ ទិសដៅពីត្បូងទៅជើងលុះមកដល់ចំណុចកើតហេតុរថយន្តបត់ឆ្វេងបំណងចូលផ្លូវអក្សរតេ(ផ្លូវទៅភ្នំបាសិដ្ឋ)មិនទាន់បត់ឆ្លងផុតផងក៏ស្រាប់តែម៉ូតូមួយគ្រឿងខាងលើដែលជិះដោយជនរងគ្រោះពីរនាក់ឌុបគ្នាទិសដៅពីជើងទៅត្បូងក្នុងល្បឿនយ៉ាងលឿនជ្រុលចង្កូតទៅបុកកង់ក្រោយរថយន្តផ្នែកខាងស្តាំពេញទំហឹងបណ្តាលឲ្យដួលបោកក្បាលរបួសធ្ងន់ម្នាក់និងម្នាក់ទៀតស្លាប់ភ្លាមៗនៅកន្លែងកើតហេតុ។

ក្រោយពេលកើតហេតុសមត្ថកិច្ចមូលដ្ឋានបានទាក់សមត្ថកិច្ចជំនាញមកធ្វើការវាស់វែងយករថយន្តនិងម៉ូតូយកទៅរក្សាទុកនៅផ្នែកចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ។

ចំណែកជនរងគ្រោះដែលរបួសធ្ងន់ត្រូវបានដឹកទៅសង្គ្រោះនៅមន្ទីរពេទ្យរីឯសពដឹកទៅរក្សាទុកនៅវត្តទឹកថ្លារង់ចាំសាច់ញាតិមកទទួលយកទៅធ្វើបុណ្យតាមប្រពៃណី៕