ក្រុមបាល់ទាត់ជម្រើសជាតិកម្ពុជា បានបរាជ័យធ្ងន់ក្រោមថ្វីជើង ក្រុមបាល់ទាត់ជម្រើសជាតិវៀតណាម ដោយលទ្ធផល ០ទល់៥ មុននេះបន្តិច ដែលធ្វើឡើងនៅលើវាលស្មៅធម្មជាតិនៃកីឡដ្ឋាន My Dinh នាទីក្រុង ហាណូយ ប្រទេស វៀតណាម។

ការប្រកួតនេះធ្វើឡើងក្នុងជំនួបលើកទី៤ នៃវគ្គជម្រុះប្រចាំពូល C ក្នុងពានរង្វាន់ AFC Asain Cup 2019។ ខណ:ដែលប៉ះគ្នាលើកមុន ក្រុមគោព្រៃកម្ពុជា ក៏បានខកចិត្តយ៉ាងខ្លាំងបន្ទាប់បរាជ័យពីសំណាក់ក្រុមភ្ញៀវ វៀតណាម ក្នុងលទ្ធផល ១ទល់២ កាលពីថ្ងៃទី០៥ ខែកញ្ញា ដែលនៅក្នុងទឹកដីខ្លួនឯង នាពហុកីឡដ្ឋានជាតិ។​ ហើយនៅពេលនេះបានចាញ់យ៉ាងច្រើនគ្រាប់ទៀត ក្រុមផ្កាយមាសនៅតែរក្សាប្រវត្តមិនធ្លាប់ចាញ់កម្ពុជាបានដដែល។

គ្រាប់បាល់ទាំង ៥គ្រាប់ របស់ក្រុមម្ចាស់ផ្ទះរកបានដោយកីឡាករ ៥រូប Thanh Trung Dinh
(១៣), Van Quyet Nguyen (៥៦), Anh Duc Nguyen (៦០), Cong Phuong Nguyen (៧៦) និងគ្រាប់ចុងក្រោយរកបានជិតចប់ការប្រកួតពោលគឺនាទី៩០៎ ដែលធ្វើបានសម្រេចដោយកីឡាករទើបប្តូចូល Hong Quan Mac ។

គិតត្រឹមជំនួបលើកទី៤នេះ ក្រុមគោព្រៃ ស្ថិតនៅលេខ៣ ដដែលដោយកំពុងមាន ៣ពិន្ទុក្នុងដៃ ខណ:ដែលក្រុមផ្កាយមាស ក៏នៅតែរក្សាចំណាត់ថ្នាក់លេខ២ ប៉ុន្តែបានតាមស្មើពិន្ទុគ្នាជាមួយ ហ្ស៊កដានី ពោលគឺមាន ៨ពិន្ទុ ដូចគ្នាតែចាញ់គ្រាប់ស៊ុត បន្ទាប់ពីក្រុមលេខ១ បានប្រកួតស្មើគ្នាជាមួយ ក្រុមបាតតារាង អាហ្គានីស្ថាន ៣ទល់៣ មុននេះបន្តិចដែរ៕