ភ្នំពេញ: បុរសម្នាក់បើកបរថយន្តបាទ្បែនមួយគ្រឿងដឹកឈើប្រណីតខុសច្បាប់ពេញរថយន្តបើកបោះពួយយ៉ាងលឿនខណ:មកដល់ចំណុចផ្លូវបែកជាបួនក៏ជ្រុលទៅបុករថយន្តមួយគ្រឿងទៀតពេញទំហឹងបណ្តាលឲ្យរងការខូចខាតបើកទៅមុខលែងរួច។

ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង១០និង៤០នាទីយប់ ថ្ងៃទី១០ ខែតុលា ឆ្នាំ២០១៧ត្រង់ចំណុចផ្លូវហាណូយកែងនិងផ្លូវសម្តេចជាស៉ីម ស្ថិតក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើកបររថយន្តមួយគ្រឿងម៉ាក កាមេរីបាទ្បែន ពណ៌ទឹកប្រាក់ ពាក់ស្លាកលេខ បន្ទាយមានជ័យ 2A-2517 ដោយមានដឹកឈើប្រណីតខុសច្បាប់ប្រភេទធ្នុងពេញរថយន្តក្រោយក្របកំណាត់យ៉ាងជិតឈឹង ហើយរថយន្តបិទកញ្ចក់ខ្មៅទៀតផង ដោយធ្វើដំណើរតាមបណ្តោយផ្លូវហាណូយ ក្នុងទិសដៅពីជើងទៅត្បូងនិងក្នុងល្បឿនយ៉ាងលឿនលុះមកដល់ចំណុចកើតហេតុក៏បានបត់ស្តាំទៅផ្លូវសម្តេចជាស៉ីម ខណ:ពេលនោះស្រាប់មានរថយន្តមួយគ្រឿងទៀតម៉ាក ឡិចស៉ីសLX470 ពណ៌ស អត់ចាំស្លាកលេខ ដោយធ្វើដំណើរតាមបណ្តោយផ្លូវហាណូយ ក្នុងទិសដៅបញ្ច្រាសទិសគ្នានិងក្នុងល្បឿនលឿនដូចគ្នា រួចក៏បានបត់ឆ្វេងទៅផ្លូវសម្តេចជាស៉ីមទៅបុក រថយន្តខាងលើចំពីមុខពេញទំហឹងបណ្តាលឲ្យរថយន្តឡិចស៉ីសរងការខូចខាតយ៉ាងដំណំហើយព្យាយាមបើករត់គេចខ្លួនបាត់ស្រមោល ចំណែកឯរថយន្តកាមេរីបាទ្បែនរងការខូចខាតក្រពិតផ្នែកខាងមុខយ៉ាងដំណំ ភ្លាមៗនោះអ្នកបើកបររថយន្តបាទ្បែនបានបើកទ្វារថយន្តចុះរត់គេចខ្លួនបាត់ស្រមោលបន្សល់ទុកតែរថយន្តរួមទាំងឈើប្រណីតខុសច្បាប់នៅនឹងកន្លែងកើតហេតុ។

ក្រោយពេលកើតហេតុរថយន្តបាទ្បែនខាងលើរួមទាំងឈើប្រណីតនៅក្នុងរថយន្តត្រូវបានសមត្ថកិច្ចជំនាញចរាចរណ៍ខណ្ឌសែនសុខធ្វើការស្ទូចយកទៅរក្សាទុកបណ្តោះអាសន្ននៅអធិការដ្ឋាននគរបាលខណ្ឌសែនសុខដើម្បីរង់ចាំធ្វើការចាត់ការទៅតាមនិតិវិធីច្បាប់៕