ភ្នំពេញ: គ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីមានបុរសម្នាក់បានស្លាប់បាត់បង់ជីវិត ក្រោយពីបានបើកម៉ូតូក្នុងល្បឿនលឿន គេចពីមនុស្សដើរឆ្លងផ្លូវក៏ជ្រុលទៅបង្គោលភ្លើងដែកមួយដើម។

ហេតុការណ៍ដ៏រន្ធត់នេះកើតឡើងកាលពីវេលាម៉ោង២និង៣០នាទីរំលងអធ្រាត្រ ឈានចូលថ្ងៃទី១២ ខែតុលា ឆ្នាំ២០១៧ ស្ថិតនៅតាមបណ្ដោយផ្លូវជាតិលេខ២ត្រង់ចំណុចរោងចក្រអគ្គិសនីទី២ ក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។

ជនរងគ្រោះមានឈ្មោះ ធី ចាន់ដេត ភេទប្រុស អាយុ២៧ឆ្នាំ មុខរបរធ្វើការនៅហាងមួយកន្លែង ស្នាក់នៅចាក់អង្រែក្រោម ខណ្ឌមានជ័យ រាជធានីភ្នំពេញ (ក្រោយរោងចក្រអគ្គិសនីទី២)។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើកម៉ូតូម៉ាកអាយខុន ពណ៌សលាយក្រហម ពាក់ស្លាកលេខ ភ្នំពេញ 1AH-8920 បើកពីជើងទៅត្បូងក្នុងល្បឿនលឿនខណ:មកដល់ចំណុចកើតហេតុខាងលើ បានគេចពីមនុស្សដើរឆ្លងផ្លូវ ក៏បានជ្រុលទៅបុកបង្គោលភ្លើងពេញទំហឹងបណ្ដាលបែកក្បាលធ្លាយខួរចេញមកក្រៅស្លាប់ក្នុងថ្លុកឈាមគួរឲ្យរន្ធត់។

ក្រោយពេលកើតហេតុសមត្ថកិច្ចចរាចរណ៍មូលដ្ឋានបានចុះមកដល់កន្លែងកើតហេតុ បានធ្វើកំណត់ហេតុរួចប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណីនៅឯវត្តចាក់អង្រែក្រោម ៕