ភ្នំពេញ: រថយន្តម៉ាកអុីស៊ុយស៊ុយមួយគ្រឿង របស់ក្រុមហ៊ុនអ្នកផ្គត់ផ្គង់សម្ភារ:ចិញ្ចឹមឃ្មុំ បានរងការខូចខាតក្រពឹតខាងមុខ និងចំហៀងខ្លួន យ៉ាងដំណំ ខណ:ពេលកំពុងបើកបរឆ្លងផ្លូវ ហើយបានវ៉ាក់ជាមួយរថយន្តហ៊ីយ៉ាន់ដាយយីឌុបដឹកទំនិញមួយគ្រឿងដែលកំពុងបើកបរតាមផ្លូវត្រង់ រួចក៏បានបុកគ្នាពេញទំហឹង កាលពីវេលាម៉ោង៩ព្រឹក ថ្ងៃទី១២ ខែតុលា ឆ្នាំ២០១៧ នៅលើកំណាត់ផ្លូវជាតិលេខ៤ ត្រង់ចំណុចមុខមន្ទីរពហុព្យាបាលឡាំប៊ុន ថន ស្ថិតនៅក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

រថយន្តដែលបើកបុកគ្នានោះ១គ្រឿងម៉ាកអុីស៊ុយស៊ុយ ពណ៌ខ្មៅ ពាក់ស្លាកលេខ ភ្នំពេញ 2O-2074 ដែលជាកម្មសិទ្ធិ របស់ក្រុមហ៊ុនអ្នកផ្គត់ផ្គង់សម្ភារ:ចិញ្ចឹមឃ្មុំ បានរងការខូចខាតក្រពឹតមុខនិងចំហៀងខ្លួនយ៉ាងដំណំ និងបើកបរដោយបុរសមិនស្គាល់ឈ្មោះម្នាក់។ ចំណែករថយន្តមួយគ្រឿងទៀតម៉ាកហ៊ីយ៉ាន់ដាយ យីឌុប ពណ៌ក្រហម ពាក់ស្លាកលេខ ភ្នំពេញ3C-0099ដឹទំនិញ របស់ក្រុមហ៊ុនដឹកជញ្ជូនTR និងបើកបរដោយបុរសមិនស្គាល់អត្តសញ្ញាណដូចគ្នាដែរ។

តាមប្រភពព័ត៌មានបានឲ្យដឹងថា នៅមុនពេលកើតហេតុរថយន្តដឹកទំនិញបានបើកបរធ្វើដំណើរក្នុងទិសដីពី កើតទៅលិចក្នុងល្បឿនលឿនដែរ លុះពេលទៅដល់ត្រង់ចំណុចកើតហេតុខាងលើ ស្ថិតនៅខាងលិចផ្សារជម្ពូវ័ន្ត ក៏ស្រាប់តែរថយន្តម៉ាកអុីស៊ុយស៊ុយ របស់ក្រុមហ៊ុនអ្នកផ្គត់ផ្គង់សម្ភារ:ចិញ្ចឹមឃ្មុំ បើកឆ្លងកាត់ផ្លូវខាងមុខពីជើងទៅត្បូង។ទើបពេលនោះបានបុកគ្នាពេញទំហឹង បណ្ដាលឲ្យទទួលរងនូវការខូចខាតតែម្ដង ហើយក្រោយពេលកើតហេតុភាគីទាំង២ បានធ្វើការសម្របសម្រួលគ្នា បញ្ចប់រឿងនៅកន្លែងកើតហេតុនោះ ប៉ុន្តែមិនបានដឹងថា បញ្ចប់ដោយមានសំណងឬក៏ស្មើរគ្នាដោយយករថយន្តទៅធ្វើការជួសជុលរៀងៗខ្លួននោះឡើយ៕