កំពង់ស្ពឺ: លោកតាប់ លន ស្នងការរងខេត្តកំពង់ស្ពឺ ទទួលផែនសណ្តាប់ធ្នាប់ និងចរាចរណ៍ បានប្រាប់Post Newsថា មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង រវាងរថយន្តហ៊ីយ៉ាន់ដាយ បានបុកជាមួយនឹងម៉ូតូសេ១២៥ បណ្តាលឲ្យ២នាក់ប្តីប្រពន្ធរងរបួសធ្ងន់និងស្រាល ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង៦និង៥០នាទី ព្រឹកថ្ងៃទី១២ ខែតុលា ឆ្នាំ២០១៧ ស្ថិតនៅចំណុចផ្លូវជាតិលេខ៤ គីឡូម៉ែត្រលេខ៧៣-៧៤ ភូមិតាឡាត់ថ្មី ឃុំអុរ ស្រុកភ្នំស្រួច ខេត្តកំពង់ស្ពឺ។

សមត្ថកិច្ចបានឲ្យដឹងថា ជនរងគ្រោះទាំង២នាក់ ប្តីប្រពន្ធខាងលើនេះ មានឈ្មោះ ជា ជីម ភេទប្រុស អាយុ៦៨ឆ្នាំ ជាប្តីរបស់ស្ត្រីរងគ្រោះឈ្មោះ សៅ ថុន ភេទស្រី អាយុ៦៣ឆ្នាំ នៅភូមិចេក ឃុំអុរ។

ប្រភពព័ត៌មានបានឲ្យដឹងថា មុនពេលកើតហេតុ ម៉ូតូសេ១២៥ ពណ៌ខ្មៅ ពាក់ស្លាកលេខ កំពង់ស្ពឺ 1G-9522 បានជិះឌុបគ្នា២នាក់ប្តីប្រពន្ធ ស្របទិសគ្នាជាមួយនឹងរថយន្តបង្កម៉ាក ហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ ភ្នំពេញ 3D-9067 ពីលិចទៅកើត លុះដល់ចំណុចកើតហេតុ ក៏បានបុកជាមួយនឹងម៉ូតូជនរងគ្រោះដែលនៅខាងមុខពេញទំហឹង បណ្តាលឲ្យបុរសជាប្តីរបួសធ្ងន់ខ្ទេចជើង និងស្ត្រីជាប្រពន្ធរងរបួសស្រាល។ ភ្លាមៗនោះរថយន្តបង្ក បានបើករត់មកទិសខាងកើត មកទុកនៅក្នុងក្រុមហ៊ុនកិនថ្មតុងហ្វុង ចំណែកអ្នកបើកបរបានចុះរត់គេចខ្លួនបាត់ស្រមោល។

ក្រោយកើតហេតុ សមត្ថកិច្ចបានចុះមកឃាត់រថយន្តនិងម៉ូតូជនរងគ្រោះ យកទៅកាន់អធិការដ្ឋានស្រុកភ្នំស្រួច រក្សាទុករង់ចាំដោះស្រាយគ្នាតាមច្បាប់បន្តទៀត៕