ភ្នំពេញ: បុរសដែលជាមិត្តនិងគ្នា២នាក់ បានទៅចូលរួមពិធីមង្គលការមិត្តភក្តិ រួចបានអង្គុយតុហូបចុកជាមួយគ្នា និងផឹកស៊ីសប្បាយជល់កែវលើកដាច់ៗ រហូតដល់ពេលស្រវឹងរៀងខ្លួន ខឹងបុរសម្នាក់វាយក្បាលមួយដៃ បង្កឲ្យមានជម្លោះវាយតប់គ្នាផ្អើលពេញរោងការ បណ្តាលឲ្យរងរបួសបែកក្បាលទាំងសងខាង ធ្វើឲ្យមានការភ្ញាក់ផ្អើលកាលពីវេលាម៉ោង១០និង៥០នាទីយប់ ថ្ងៃទី១១ ខែតុលា ឆ្នាំ២០១៧ នៅផ្ទះរោងការក្នុង ភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ភាគីដែលបង្កមានឈ្មោះ ជា ចាន់ដា ភេទប្រុស អាយុ២៤ឆ្នាំ មុខរបររដ្ឋាករទឹក រស់នៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រងរបួសបែកក្បាលមិនទាន់ដេរ ។ ភាគីម្ខាងទៀតឈ្មោះ កុយ វ៉ាន់ដេត ភេទប្រុស អាយុ២១ឆ្នាំ មុខរបរកាត់សក់ រស់នៅភូមិជម្ពូវន្ត សង្កាត់ចោមចៅ ខណ្ឌពោធិ៍សែនជ័យ របួសបែកក្បាលដេរ៥ថ្នេរ ។

តាមសម្តីរបស់ឈ្មោះ កុយ វ៉ាន់ដេត រងរបួសបែកក្បាលដេរ៥ថ្នេរ បាននិយាយឲ្យដឹងថា នៅមុនពេលកើតហេតុ គាត់ និងភាគីម្ខាងទៀត ដែលរងរបួសដែលនោះ ជាមិត្តភក្តិនិងគ្នា បានទៅហូបការមិត្តភក្តិនៅចំណុចកើតហេតុខាងលើ ដោយអង្គុយផឹកស៊ីនៅតុជាមួយគ្នា និយាយលេងសើចសប្បាយក្អាកក្អាយ ជល់កែវលើកដាច់ៗ រហូតស្រវឹងរៀងខ្លួន ។ បន្ទាប់មកស្រាប់តែឈ្មោះ ជា ចាន់ដា បានយកដៃទះក្បាលរបស់គាត់របៀបលេងសើច ធ្វើឲ្យមានការខឹងសម្បារ ក៏ផ្ទុះជម្លោះវាយតប់គ្នាមួយប្រាវ ដោយមានមិត្តភក្តិជួយវាយគ្នាទៅវិញទៅមកផងដែរ បណ្តាលឲ្យរងរបួសបែកក្បាលហូរឈាមជោកអាវទាំងសងខាង និងធ្វើឲ្យផ្អើលភ្ញៀវការ ដែលកំពុងតែផឹកស៊ីនោះរត់គ្រប់គ្នា ហើយរូបគាត់ ក៏បានរត់ចោលម៉ូតូនៅផ្ទះការ បានទៅដេរមុខរបួសបែកក្បាលចំនួន៥ថ្នេរ រួចហើយឪពុកបាននាំទៅប្តឹងសមត្ថកិច្ចតែម្តង ។ ខណ:នោះឈ្មោះ កុយ វ៉ាន់ដេត កំពុងតែដាក់ពាក្យបណ្តឹង ស្រាប់តែភាគីម្ខាងទៀតឈ្មោះ ជា ចាន់ដា ត្រូវបានឪពុករបស់គេបាននាំទៅប្តឹងដែរ ទាំងនៅឈាមហូរ មិនទាន់ទៅដេរមុខ របួសនៅឡើយទេ ។ ដោយឈ្មោះ ជា ចាន់ដា បាននិយាយថា ពេលដែលរូបគាត់កំពុងតែជល់កែវគ្នា បានវាយឈ្មោះ កុយ វ៉ានដេត ១ដៃលេង ស្រាប់តែឈ្មោះ កុយ វ៉ាន់ដេត បានយកកែវមកគប់ក្បាលគាត់ចំនួន២កែវ បណ្តាលឲ្យបែកក្បាលរយះចំនួន២កន្លែងខាងស្តាំ ហូរឈាមស្រោចពេញខ្លួន ។

ក្រោយពេលកើតហេតុ ឪពុកភាគីទាំងសងខាង ដែលជាមិត្តភក្តិនិងគ្នា ហើយអ្នកទាំងពីរសុទ្ធតែរងរបួសបែកក្បាលហូរឈាមដូចគ្នា ដោយម្នាក់បែកក្បាលខាងឆ្វេងដេរ៥ថ្នេរ និងម្នាក់ទៀតត្រូវ២កែវបែកខាងស្តាំ ទើបភាគីទាំងពីរ បានសម្របសម្រួលគ្នាឈប់ប្តឹងប្តល់ ហើយធ្វើកិច្ចសន្យាមិនគុំគួនគ្នា និងបន្តរាប់អានគ្នាជាមិត្តភក្តិបន្តទៅមុខទៀត ៕