ភ្នំពេញ: ជនសង្ស័យលួចកាច់កម៉ូតូឌ្រីមសង់សេ១២៥ សេរី២០០៨ ពណ៌ខ្មៅនៅខាងមុខផ្សារហេងលី តាមផ្លូវ២៧១ សង្កាត់ទឹកថ្លា ខណ្ឌសែនសុខ ត្រូវម្ចាស់ឃើញទាន់ស្រែកឆោឡោ បង្កការភ្ញាក់ផ្អើលដល់ប្រជាពលរដ្ឋព្រួតវាយមួយដៃមួយជើងស្ទើរក្ស័យ ទើបប្រគល់ជូនសមត្ថកិច្ច ហេតុការណ៍នេះកើតឡើងនៅម៉ោង១៥:៥៥នាទី ថ្ងៃទី៥ ខែមិថុនា ឆ្នាំ២០១៦នេះ។
ម្ចាស់ម៉ូតូសង់សេ១២៥ សេរី២០០៨ ពណ៌ខ្មៅ ស្លាកលេខភ្នំពេញ1Q-8555 បានប្រាប់ថា គាត់បានមកឈប់ចតនៅកន្លែងកើតហេតុ ចុះមកបន្តិចស្រាប់តែក្រឡេកឃើញជនសង្ស័យឡើងជិះម៉ូតូបម្រុងចាកចេញក៏ស្រែកឆោឡោថា ចោរៗ បង្កការភ្ញាក់ផ្អើលដល់បងប្អូនប្រជាពលរដ្ឋក៏ព័ទ្ធចាប់វាយមួយដៃមួយជើងស្ទើរក្ស័យ ទើបប្រគល់ជូនសមត្ថកិច្ច។
បច្ចុប្បន្ន ជនសង្ស័យត្រូវបាននរគបាលនាំមកសាកសួរនៅអធិការដ្ឋាននរគបាលខណ្ឌសែនសុខ ដើម្បីចាត់ការតាមនីតិវិធី៕
មតិយោបល់