ពោធិ៍សាត់ៈ លោកវរសេនីយ៍ទោ ធាង ឡេង អធិការនគរបាលស្រុកវាលវែងបានប្រាប់Post Newsថា មានករណីគ្រោះថ្នាក់ចរាចរណ៍មួយរវាងរថយន្តម៉ាកស៊ាំយ៉ុង មួយគ្រឿងបានបុកស្ត្រីម្នាក់ដែលកំពុងដើរថ្មើរជើងពេញទំហឹង បណ្តាលឲ្យស្លាប់នៅនឹងកន្លែង។

ហេតុការណ៍នេះកើតឡើងនៅម៉ោង៦និង៣០នាទីយប់ ថ្ងៃទី២២ ខែតុលា ឆ្នាំ២០១៧ ស្ថិតនៅចំណុចភូមិប្រម៉ោយ ឃុំប្រម៉ោយ ស្រុកវាលវែង ខេត្តពោធិ៍សាត់។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្តម៉ាកសាំយ៉ុង ពណ៌សំបកឪឡឹក ពាក់ស្លាកលេខ ភ្នំពេញ 2U-5491 បើកបរពីកើតទៅលិច ដោយឈ្មោះ ឈិត ប៉ែត ភេទប្រុស អាយុ៣៥ឆ្នាំ រស់នៅភូមិប្រម៉ោយ ឃុំប្រម៉ោយ ស្រុកវាលវែង បានបុកស្ត្រីរងគ្រោះឈ្មោះ គង់ សុផានី ភេទស្រី អាយុ៥៥ឆ្នាំ រស់នៅចំណុចកើតហេតុខាងលើ ដែលកំពុងដើរថ្មើរជើងពីជើងទៅត្បូងពេញទំហឹង បណ្តាលឲ្យស្លាប់នៅនឹងកន្លែងកើតហេតុតែម្តង។

ក្រោយកើតហេតុ សមត្ថកិច្ចបានប្រគល់សពទៅឲ្យជនរងគ្រោះធ្វើបុណ្យតាមប្រពៃណី។ ចំណែករថយន្តបង្កត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុករង់ចាំដោះស្រាយគ្នាតាមច្បាប់បន្តទៀត៕