ភ្នំពេញៈ យុវជន២នាក់បើករថយន្តខ្វះការប្រុងប្រយត្ន័ ជ្រុលចង្កូតទៅបុករថយន្តមួយគ្រឿងទៀតបើកនៅខាងមុខចំពីក្រោយពេញទំហឹង បណ្តាលឲ្យរងការខូចខាតទាំងសងខាង សំណាងល្អមិនមានអ្នកណារងរបួស។

ហេតុការណ៍នេះកើតឡើងកាលពីវេលាម៉ោង៨និង៣០នាទីយប់ថ្ងៃទី២៩ ខែតុលា ឆ្នាំ២០១៧ស្ថិតនៅតាមបណ្តោយផ្លូវព្រះមុនីវង្ស ទល់មុខភោជនីយដ្ឋាន(ហុងជី) ក្នុងសង្កាត់បឹងកេងកង២ ខណ្ឌចំការមន រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញយុវជន២នាក់ បើករថយន្តមួយគ្រឿងម៉ាកហ៊ីយ៉ាន់ដាយមួយបាំងកន្លះ ពណ៌ទឹកប៊ិច ពាក់ស្លាកលខ ភ្នំពេញ2AL-3706 បើកបរពីជើងទៅត្បូង លុះមកដល់ចំណុចកើតហេតុខាងលើ បានវ៉ាក់អឺនិងរថយន្តមួយគ្រឿងទៀតមិនចាំម៉ាក រយ៉ែកាត់ពីមុខហើយបានគេចក៏ជ្រុលចង្កូចទៅបុករថយន្តមួយគ្រឿងទៀតម៉ាកឡិចសុីស៥៧០ ពណ៌ស ពាក់ស្លាកលេខ ភ្នំពេញ 2AG-0119 ជិះដោយប្តីប្រពន្ធ២នាក់ បើកបរនៅខាងមុខស្របទិសដៅគ្នាពេញទំហឹង បណ្តាលឲ្យរថយន្ត៥៧០ កំពិតផ្នែកខាងក្រោយយ៉ាងដំណំ។ ចំណែករថយន្តបង្កខូចខាតផ្នែកខាងមុខយ៉ាងដំណំផងដែរ តែសំណាងមិនបង្កឲ្យមានអ្នកណារងរបួសនោះទេ។

ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកវាស់វែង យករថយន្តទាំង២គ្រឿងទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំដោះស្រាយគ្នាពេលក្រោយតាមផ្លូវច្បាប់បន្តទៀត៕