ភ្នំពេញៈ ម៉ូតូកូនទាមួយគ្រឿង បើកវ៉ាមកដួលមុខរថយន្តទ្បិចស៊ីសកំពុងតែបើកបរចាប់ហ្រ្វាំងភ្លាមៗ ក៏មានរថយន្តកាមេរីបាឡែនមកពីក្រោយបុកពេញទំហឹង បណ្តាលឲ្យរថយន្តបាឡែន ខូចខាតយ៉ាងដំណំ។

ហេតុការណ៍នេះកើតឡើងកាលពីវេលាម៉ោង ១២និង១០នាទី រំលងអធ្រាត្រឈានចូលថ្ងៃទី៣០ ខែតុលា ឆ្នាំ២០១៧ ស្ថិតនៅតាមបណ្តោយផ្លូវព្រះមុនីវង្ស សង្កាត់បឹងកេងកងទី២ ខណ្ឌចំការមន រាជធានីភ្នំពេញ ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូធូដេមួយគ្រឿង ជិះវ៉ាលើចំណែកផ្លូវម៉ូតូមកខាងផ្លូវរថយន្ត ក៏ប៉ះកាងខាងស្តាំរថយន្តដួល ហើយភ្លាមៗនោះក៏បានលើកម៉ូតូជិះចេញពីកន្លែងកើតហេតុបាត់ស្រមោលឈឹង ហើយរថយន្តឡិចស៊ីស៣៣០ ពណ៌ទឹកមាស ពាក់ស្លាកលេខ ភ្នំពេញ 2AN-7119 បើកបរដោយនារីម្នាក់ អកសឺជាមួយម៉ូតូដែលដួលចាប់ហ្រ្វាំងឈប់ភ្លាមៗ ក៏មានរថយន្តកាមរីបាឡែន ពណ៌ប្រផេះ ពាក់ស្លាកលេខ ភ្នំពេញ 2AD-3384 បើកបរដោយបុរសម្នាក់ទិសដៅពីលិចទៅកើតស្របទិសគ្នាស្រាប់តែមកបុកពីក្រោយរថយន្តឡិចស៊ីស៣៣០ពេញទំហឹងបណ្តាលឲ្យរថយន្តឡិចស៊ីសរងការខូចខាតបន្តិចបន្តួច ចំណែករថយន្តកាមេរីបាឡែនវិញរងការខូចខាតយ៉ាងដំណំ ហើយក៏មានការប្រកែកយកឈ្នះរៀងខ្លួនមួយសន្ទុះធំ។

ក្រោយពេលកើតហេតុសមត្ថកិច្ចមូលដ្ឋានបានចុះមកទាក់ទងទៅសមត្ថកិច្ចជំនាញចរាចរណ៍ខណ្ឌឲ្យមកធ្វើការវាស់វែងនឹងយករថយន្តទាំង២ទៅរក្សាទុកនៅការិយាល័យចរាចរណ៍ផ្លូវគោកនៃអធិការដ្ឋាននគរបាលខណ្ឌចំការមន ដើម្បីដោះស្រាយគ្នាទៅតាមនិតិវិធីនៃច្បាប់បន្តទៀត៕

https://youtu.be/Se2ATsm6DC4